Засгийн газрын ээлжит бус хуралдаанаар Ипотекийн зээл, санхүүжилтийн ерөнхий журмыг батлав.

Ирээдүйн тэтгэвэрийн сангийн тухай хууль батлагдсантай холбогдуулан тус сангийн 2016 оны төсвийн тухай хуулийн төслийг боловсруулж, Засгийн газарт танилцуулан УИХ-ын хаврын чуулганаар хэлэлцүүлэх, Ирээдүйн тэтгэвэрийн сангийн тухай хуульд заасны дагуу Монголбанктай гэрээ байгуулах, ипотекийн зээл олгох үйл ажиллагааг холбогдох байгууллагатай хамтран үргэлжлүүлэн хэвийн, тасралтгүйгээр зохион байгуулахыг Сангийн сайд Б.Болор, Хүн амын хөгжил, нийгмийн хамгааллын сайд С.Эрдэнэ нарт даалгасан байна. Улмаар эхний ээлжинд Улаанбаатар хотын шинэ болон гэр хорооллын дахин төлөвлөлтийн бүс, алслагдсан дүүрэг, 21 аймгийн нутаг дэвсгэрт орон сууц худалдан авах ипотекийн зээлийн хүүг эхний ээлжинд бууруулж, бусад байршилд орон сууц худалдан авах ипотекийн зээлийн хүүг цаашид үе шаттайгаар бууруулах арга хэмжээ авч ажиллахаар болжээ. Таван хувийн зээлийн хүүнд Багахангай, Багануур, Налайх дүүрэгт баригдсан орон сууцнаас худалдан авсан тохиолдолд багтах боломжтой бөгөөд хотын товд үйлчлэхгүй аж. 

Дашрамд дурдахад, Ипотекийн зээлийн хүүг таван хувьд шилжүүлснээр Улаанбаатар хотод 18 450 айл өрх найман хувийн зээлээс шилжин орох боломжтой юм.