Түрээсийн орон сууц хөтөлбөр энэ сарын нэгнээс хэрэгжиж эхлэх байсан ч ТОСК журмаа тодорхой болгоогүй учир гуравдугаар сарын 15-наас хэрэгжинэ хэмээн мэдээлсэн.

Найман хувийн ипотекийн зээлийн урьдчилгаагаа төлж чадахгүй залуу гэр бүл, өндөр настан, төрийн албан хаагч, өрх толгойлсон эцэг эх, байгалийн гамшигт өртсөн айл өрх гээд олон хүний хувьд хүлээлт үүсгэсэн сэдэв нь Түрээсийн орон сууц хөтөлбөр болоод байна. Эхний ээлжинд 929 айлын орон сууцыг хөтөлбөрт хамруулах тов гарсан. Ингэхдээ төрийн болон орон нутгийн өмчийн нэг сарын төлбөрийг орон сууцны нийт талбайн хэмжээ, өрөөний тоог харгалзан нийслэлд 200.0-280.0 мянган төгрөг, орон нутагт 140.0-230.0 мянган төгрөг байна. Түрээсийн гэрээ хийсэн иргэн тухайн байранд 5 жил хүртэл хугацаагаар амьдраад дараагийн айлдаа шилжүүлэх журамтай. Өөрөөр хэлбэл, урьдчилгаа төлбөрөө гүйцээгээд өөрийн болгох боломжгүй.