Хятадын засгийн газар сүүлийн жилүүдэд тус улсад ихээр баригдах болсон “этгээд” хийцтэй барилгуудад албан ёсоор хориг тавьж, цаашид ийм төрлийн барилга барихгүй байхыг анхаарууллаа. Эдийн засгийн өсөлтийг даган барилгын салбарын хөгжил хурдсахын хэрээр этгээд хачин хэлбэр дүрстэй, өвөрмөц барилгуудын тоо эрс нэмэгдсэн байна. Данх хэлбэртэйгээс авахуулаад CCTV-ийн тэнгэр баганадсан өмд хэлбэртэй цамхаг хүртэл нүд булаам сонирхолтой олон янзын барилга Хятадад ээлж дараалан сүндэрлэсээр байсан юм.

     Гэвч өнгөрөгч Ням гаригт гаргасан Хятадын засгийн газрын Төрийн зөвлөлийн шийдвэрээр ийнхүү хориг арга хэмжээ авахаар болжээ.  АНУ-ын Конгрессын ордноос ЮНЕСКО-ийн хамгаалалтад байдаг Австралийн Холлсатт хөндий гээд барууны алдартай барилга байгууламжуудыг дуурайлган барьж байгаад ихээхэн шүүмжлэлтэй хандаж, ерөнхийлөгч Ши Зяньпин аль 2014 онд өвөрмөц хэлбэр дүрстэй барилгуудыг барихыг хориглохыг дэмжиж байсан юм.

     “South China Morning Post” сонины дамжуулснаар, уг шийдвэрээр Хятадад баригдаж буй барилгууд нь хэт нүсэр бөгөөд этгээд хэлбэр дүрсгүй, тав тухтай, эдийн засгийн хэмнэлттэй, байгаль орчинд ээлтэй, үзэмжтэй байх ёстой гэсэн шаардлагыг хот төлөвлөлтийн ерөнхий төлөвлөгөөнд тусгаж байгаа аж.

     Этгээд хачин хэлбэртэй барилгууд нь үзэмжгүй харагддаг төдийгүй, татвар төлөгчдийн мөнгийг дэмий шамшигдуулж байгаа хэрэг хэмээн эрх баригчид үзжээ. Түүнчлэн Шанхайн Жяатонгийн их сургууль дахь Хот төлөвлөлтийн шинжлэх ухааны хүрээлэнгийн тэргүүн Лью Шилин ярихдаа, олон нийтийн сангийн хөрөнгөөр баригдсан барилгуудын ихэнх нь нийтийн зориулалттай биш байгааг анхааруулсан байна.