/Орон сууцны үнэ ханшаар тэргүүлэгч дэлхийн 10 хот/

“Knight Frank” судалгааны байгууллагаас Олон улсын орон сууцны үнийн индексийг гаргажээ. Ингэхдээ нэг сая ам.доллараар хаана, хэдэн ам метр талбайтай байр авч болох талаар судалгаа хийж, дэлхийн хамгийн өндөр үнэ ханштай байр байдаг 10 хотыг эрэмбэлэн тогтоосон байна.

Шанхай



Жагсаалтын аравдугаарт багтсан Шанхай хотод нэг сая ам.доллараар тансаг зэрэглэлийн 46.2 ам метр талбайтай орон сууц авах боломжтой.

Москва


Москвагийн чинээлэг иргэдийн амьдардаг дүүрэгт нэг сая ам.доллараар 43 ам метр хэмжээтэй орон сууц худалдан авах боломжтой. Харин Остоженка голын эрэг дээрх орон сууцны сүр жавхлан төгс цогцолборт байр авбал үнэ ханш нь 2.2 сая ам.доллараас эхлэх аж.

Парис


Нэг сая ам.доллар бол Парисын орон сууцны 41.7 ам метр талбайн үнэ юм. Энэ нь Парисын 7 дугаар тойргийн төв хэсэгт байрлах цэцэрлэгт хүрээлэнтэй ногоон орчинг бий болгосон орон сууцнуудын нэг юм.

Сидней


Үл хөдлөх хөрөнгийн зах зээлийн хөгжлөөрөө дэлхийд дээгүүр нэрлэгддэг Сиднейн Даун Андер дүүрэгт амьдрахаар төлөвлөж буй хүн нэг сая ам.доллараар 41.2 ам метр талбайтай тансаг байранд амьдрах боломжтой.

Нью-Йорк


Дэлхийн хөрөнгийн зах зээлийн төвлөрөл болсон алдарт Нью-Йоркт нэг сая ам.доллараар 40.2 ам метр хэмжээтэй байр авч болно. Ялангуяа Манхэттаны Трибека дүүрэгт байрлах 22 айлын “Стерлинг Мейсон” тансаг орон сууцны цогцолборт байрны үнэ энэ түвшинд байдаг аж.

Женев


Жагсаалтын дугаар дээшлэх тусам нэг сая ам.доллараар худалдан авах байрны талбай жижгэрсээр байна. Тухайлбал, Женевт дээрх хэмжээний мөнгөөр ердөө 34.7 ам метр байр авах боломжтой. ЮНЕСКО-ийн хамгаалалтад бүртгэгдсэн Женева нуур, Альпийн нурууны бараа харагдах газарт орших Ду Парк Кемпинский орон сууцанд нэг сая ам.доллараар дээрх хэмжээний байрыг авч болно.

Сингапур


Сингапур улс хотын хувьд өчүүхэн төдий зай талбай ч асар өндөр үнэ цэнэтэй. Энд нэг сая ам.доллар гэдэг тансаг орон сууцны 32.6 ам метр талбайн л үнэ юм.

Лондон


Лондон хотод үл хөдлөх хөрөнгийн үнэ яагаад ч хямд байх боломжгүй мэт. Учир нь дэлхийн хаа нэгтээ дээд зэрэглэлийн бүхэл бүтэн амины орон сууцны үнэ хүрч мэдэх нэг сая ам.доллар нь энэ хотод орон сууцны 25.2 ам метр талбайн л үнэ хүрнэ. Тус хотын төвд орших Белгравия дүүрэгт орон сууцны үнэ 14.75 сая фунт стерлингийн үнэ хүрчээ.

Хонконг


Дэлхийн аль нэг хотод очиж, суурьшин амьдрахаар шийдсэн бол Хонконгийг сонгох гэж бүү яараарай. Учир нь энэ хотод нэг сая ам.доллар орон сууцны 20.6 ам метр талбайн үнэд л хүрнэ.

Монако



Үл хөдлөх хөрөнгийн үнээр тэргүүлэгч хотуудыг Монако тэргүүлж байна. Энэ хотод нэг сая ам.доллар нь орон сууцны 15 ам метр талбайтай л тэнцэнэ. Монакогийн хамгийн өндөр барилга болох Тур Одеон цогцолборт орон сууцны үнэ ханш энэ түвшин байдаг.