Oскар Рибейро де Алмейда Нимейер Соарес Фило буюу Oскар Нимейер (олонд алдаршсан нэр) 1907 оны 12 сарын 15-ны өдөр Бразилын нийслэл Рио Де Жанейро хотод мэндэлжээ. Тэрээр дэлхийн орчин үеийн архитектурын үүсэл хөгжилд ихээхэн хувь нэмэр оруулсан Бразилын нэрт архитектор юм. Хүмүүс түүнийг өөрийн эх оронд урласан иргэний барилгууд төдийгүй Нью-Йоркт байдаг НҮБ-ын төв байрны загвар гээд олон сайхан бүтээлүүдээр нь сайн мэддэг. Түүний бүтээл туурвил, гүйцэтгэсэн төслүүд нь 20-р зууны эцэс, 21-р зууны эхэн үед хамгийн нөлөөтэй, алдартай нэгэн болгосон. Түүнийг үеийнхэн дундаа хамгийн нэр алдартай нэгэн байсан хэмээн дэмжэгчид, шүтэн бишрэгчид нь үздэг юм.

     Тэрээр ажлын анхны гараагаа өөрийн эцгийн үүсгэн байгуулсан зураг төслийн компаниас эхлүүлж, удалгүй “Люсио Коста” гэх алдартай компанид архитектороор ажиллаж эхэлсэн. 1936-1943 оны хооронд тус компанийн үүсгэн байгуулагч Костагийн хамтаар олон арван барилгын төсөл дээр ажиллан, Бразилын Боловсролын яамны барилгын зураг төслийг Шведийн Архитектурын Холбооныхонтой хамтран гүйцэтгэсэн нь Нимейерийн хувьд томоохон туршлага болсон аж. 


 

 

 

     1941 онд Нимейер хувийн уран бүтээлийн замналаа Бело Горизонт хотын захад байрлах нийтийн орон сууцны барилгуудын зураг төслөөр эхэлсэн түүхтэй. Нимейер, “Би энгийн уламжлалт хэв маяг, тогтсон үзэл баримтлал, төлөвлөлтийн хязгаарлагдмал байдлыг эвдэхийг хүсдэг. Энэ хорвоо ертөнцөд өөр олон янзын хэлбэр дүрс хэрэгтэй шүү дээ” хэмээжээ. Энэхүү үзэл баримтлал нь түүнийг өнөөгийн алдар сууд хүргэх маш том түлхэц болсон гэж судлаачид үздэг. 1940-1950 оны хооронд олон улсын түвшинд болон Бразил улсад хамгийн арвин бүтээлтэй архитектороор тодорхойлогдож, бусдыгаа манлайлж байжээ. Тэрээр Сан Пауло хотын орон сууцны томоохон цогцолбор-Эдифико Сораны төсөл, Ле Корбюзейтэй хамтран Нэгдсэн Үндэсний Байгууллагын төв байрны барилгын төслийг гүйцэтгэж, Яалагийн их сургууль, Харвардын их сургуульд багшилж байв.

Түүний гүйцэтгэсэн алдартай төслүүдээс:

1. Нью-Йоркийн Дэлхийн үзэсгэлэн

1939 онд Коста, Нимейер нар хамтран Нью-Йоркийн Дэлхийн үзэсгэлэнгийн Бразилын танхимын зураг төслийг гаргасан. Тэдний энэ бүтээлийг нэлээд нүсэр болсон хэмээн судлаачид үздэг. “Энэ бол гоо үзэсгэлэнтэй, дээд зэрэглэлийн тансаг, ямар нэгэн хашлага ханагүй, байгалийн гэрэлтүүлэг сайтай орчин үеийн барилга болж чадсан” хэмээн Коста өөрийн төслийн талаар тайлбарлажээ.

2. Пампюла төсөл

1940 онд Нимейер тухайн үеийн Бело Горизонт хотын даргатай уулзаж, далайн эргийн хажууд үзэсгэлэнт орчинд барих казино, зоогийн газар, голфийн төв, бүжгийн клуб, сүм зэрэг байгууламжуудыг багтаасан Пампюла цогцолбор барилгын төслөө танилцуулсан байдаг. Төслийг хотын дарга зөвшөөрч, цогцолбор 1943 онд баригдаж дуусчээ. Цогцолборт багтсан барилга болгон олны харааг булаам үзэмж төгөлдөр, гоёмсог байсан нь судлаач, шүүмжлэгчдээс өндөр үнэлгээ авсан гэдэг.

Нимейер цогцолборын төсөл, загварыг боловсруулах явцад барилгын материалын сонголт, хийц бүтээцийн тал дээр нягт нямбай ажиллаж, барилгад ашиглах материалууд нь барилга угсралтын үйл ажиллагаа горимд бүрэн зохицохуйц байхаар шийджээ. Пампюла төслийг амжилттай гүйцэтгэснээр түүний олон улсад өрсөлдөх чадвар, нэр хүнд асар их нэмэгдсэн юм.





1940-1970 он

Энэ хугацаанд Нимейерийн уран бүтээлийн туурвил оргилдоо хүрсэн хэмээн судлаачид үздэг. Тухайн үед түүний хамгийн шилдэг бүтээлүүд болох  НҮБ-ын төв байр, Кандэлариа сүм, Копан апартмент, Францын Гэгээн Асисийн сүм баригджээ.

Барилгын хийц загваруудад өөрийн гэсэн өнгө төрхийг шингээсэн нь түүний өвөрмөц үзэл баримтлалыг илэрхийлэх мэт харагддаг байв. Түүний бүтээлийг дэмжигчид цөөнгүй байсан ч, шүүмжлэгчид ч олон байв. Харин Нимейер үзэл бодолдоо тууштай нэгэн байсан нь тэр бүх шүүмжлэлийн ард нь гарахад нөлөөлсөн биз ээ.





Томоохон төслүүдээс нь Францын Гэгээн Асисийн сүм олон улсын шүүмжлэгчдийн анхааралд хамгийн их өртсөн, шүүмжлэл болоод талархлын аль алийг нь хүртсэн цуутай бүтээл юм.

Түүний сүндэрлүүлсэн Бразилын үндэсний Конгрессын ордон, Бразилын Катедрал, Улсын Соёлын Цогцолбор, Холбооны Дээд Зөвлөлийн ордон нь 1960 он гэхэд баригдаж дуусчээ. Европын холбооны улсуудад ажиллаж, амьдарч байсан 78 жилийн турш тэрээр 600 гаруй төслийг амжилттай хэрэгжүүлсэн байна. Тэрээр Нитеройгийн орчин үеийн урлагийн музей, Оскар Нимейерийн музей зэрэг орчин үеийн хийц загвар, өнгөний гайхалтай зохилдолгоог уялдуулсан сор болсон сүүлчийн бүтээлүүдээ 1990-ээд оноос 2000 оны эхэн үед гаргасан билээ.



Нимейерийн барилгууд дэлхийн өнцөг булан бүрт өөрийн хийц загвар, өнгө төрхөө гайхуулж, өнөөг хүртэл оршин байна. Тэрээр 105 наслахдаа Бразил төдийгүй дэлхий дахинд ур чадвараа гайхуулсан олон арван гайхамшигт барилгыг сүндэрлүүлсэн юм. Орчин үеийн барилгын онол, практикт гүйцэтгэсэн бүтээлүүдээс нь олонтаа жишээ авдаг нь түүний хичнээн суут архитектор байсныг гэрчилнэ.