-Юуны өмнө МЦХҮХолбооны Тэргүүнээр сонгогдон ажиллаж байгаад нийт уншигчдынхаа өмнөөс ажлын амжилт хүсэе. Манай сайтад та анх удаа ярилцлага өгч байна, өөрийгөө товч танилцуулна уу?

Танай уншигчдад энэ онд тохиож буй Монгол Улсын барилгын салбарын 90 жилийн ойн баярын мэндийг урьдчилан хүргэе. Миний бие 2013-2014 онд холбооныхоо хяналтын зөвлөлийн даргаар ажиллаж байгаад 2015 оны 2 сараас тэргүүнээр сонгогдон ажиллаж байна.

-Танай холбоо хэрхэн бэхжиж байна вэ? Одоогоор хэчнээн гишүүн байгууллагатай бэ? Үйлдвэрлэгчдийг нэгтгэх чиглэлд ямар бодлого баримталж ажилладаг байна?

80 гаруй гишүүн байгууллагатай. Бид энэ үйлдвэрлэлийг чанартай хөгжүүлэхийг л зорьж, түүнд анхаарлаа чиглүүлэн ажиллаж байна. Тиймээс үйлдвэрлэгчдийн нэгдэх нийлэх бол тусдаа бодлого байх шаардлага байхгүй. Бидний үйл ажиллагаа ил тод явагддаг, тиймээс үйлдвэрчид асуудлаа яриад, зориод ирэхэд л хангалттай.  

-Танай Холбооны оролцоотойгоор цонх, хаалга үйлдвэрлэгчдийн хувьд бизнесийн орчинд гарч буй эерэг өөрчлөлтүүд юу байна. Өөрчлөлт, үр дүнг үйлдвэрлэгчид олж харж байна уу? 

Ямар ч бодлого хомс, стандарт норм хангалтгүй байсан үйлдвэрлэлийн салбар. Бид норм дүрэм стандартуудыг нь боловсронгүй болгож, батлуулж, хэрэгжүүлж эхлээд найман жил болж байна. Одоо ч дараа дараагийн шаардлагатай стандартуудыг боловсруулж, батлуулахаар төлөвлөн ажиллаж байна. Стандартын хэрэгжилт, бүтээгдэхүүн үйлчилгээний чанарт хяналт тавих шалгалтыг БХБЯ, МХЕГ, ХЭАХН, ШӨХТГ, Лаборатори гэх мэт төрийн байгууллагуудтай хамтран сүүлийн таван жил хийж байна. Гарсан зөрчлүүдийг арилгуулах талаар холбогдох газруудтай хамтран ажилладаг. Мөн үндэсний стандартын шаардлага хангахгүй бэлэн цонхыг хориглох, импортын бүтээгдэхүүний чанар, үйлчилгээг сайжируулах боломж, хавтгай шилний тээвэрлэлт, хуванцар бэлдэцийн үйлдвэрлэлийн түүхий эд материалын нийлүүлэлттэй холбоотой зарим асуудлууд, үндэсний үйлдвэрлэлийг дэмжих, дотоодын зах зээлийг хамгаалах гэх мэт олон асуудлуудыг хөндөн мэргэжлийн хувиар оролцох зорилт тавин ажиллаж байна.

Өөрчлөлтүүд эхнээсээ гараад эхэлсэн, барилгын захиалагч, хөрөнгө оруулагч байгууллагуудын цонхны сонголт өөрчлөгдөж байна. Тэд хямд үнэтэйг нь сонгодог байсан бол чанарт анхаарал хандуулдаг болсон. Хэрэглэгчдийн цонхны мэдэгдэхүүн сайжирч байна. Манай үйлдвэрлэгчид өөрчлөлтийг олж харж байгаа байх. Харин улсын төсвөөр баригдаж буй барилгын цонхны тухайд өөр байна.

-Тэгэхээр улсын төсвийн хөрөнгө оруулалтаар баригдаж буй барилгын цонхны чанар муу байна гэсэн үг үү?

Төсвийн хөрөнгө оруулалтаар баригдаж байгаа барилгын цонхны төсөв хамгийн хямд үнээр тусгагддаг. Метр квадрат нь 85000, 90000 гэх мэт. Ийм үнээр үндэсний стандартын шаардлага хангасан цонх гарах боломжгүй. Өнөөдөр Нийслэл хот уур амьсгалын бүсчлэлийнхээ хувьд 2-р бүсэд харьяалагддаг. Энэ бүсэд тавигдах цонхны дулаан дамжуулалтын эсэргүүцлийн үзүүлэлтээрээ Т² ангилал буюу 0.75м² х ⁰С/Вт -.79м² х ⁰С/Вт-ийн шаардлага хангасан цонх байх ёстой. Үгүйдээ Т⁵ ангилал буюу 0.60м² х ⁰С/Вт -0.69м² х ⁰С/Вт-ийн шаардлага хангасан цонх тавигдаж байж айл өрх, албан байгууллага хүйтний улиралд дулаан амьдрах боломжтой юм. Гэтэл энэ техникийн нөхцөлийг хангахгүй цонхны үнэ төсөвт суулгаад байгаа нь үндэсний стандарт норм дүрмийг зөрчих нөхцөлийг бий болгоод байна.  

-Одоо стандартын шаардлага хангасан цонхны м²-ын үнэ хэд байгаа бэ?

2 жилийн өмнө 195.000 байхаар жишиг үнэ гарч байсан. Одоо жишиг үнийг дахин төрийн байгууллагын судалгаанууд хийгдэж байна. Удахгүй тодорхой болох байх.

-Нэг үеэ бодвол Засгийн газар салбарын Мэргэжлийн Холбоодыг дэмжиж, түшиглэж, хамтран ажиллах нь хөгжлийн нэг гарц гэж хардаг болсон нь сайшаалтай. Салбарын хувьд зарим нэг чиг үүргийг ч Мэргэжлийн Холбоодод олгоод эхэлсэн. Та энэ асуудлыг юу гэж дүгнэж байгаа бэ?

Тийм шүү. Энэ нь Мэргэжлийн холбоодын явуулж буй үйл ажиллагаа эрүүл тунгалаг, мэргэшсэн байж чадаж байгаатай холбоотой байх гэж боддог. Цаашид ч олон чиг үүргийг хариуцаж авч явна гэдэгт илтгэлтэй байна.
Энэ тогтолцоо хөгжилтэй улс орнуудад зөв замаар хөгжөөд удаж байна. Манай улсын хувьд оройтсон ч одоо эхэлж байгаа нь сайшаалтай. Европын улс орнуудад төр нь яг бодлогоо барьдаг, мэргэжлийн техникийн асуудлуудаа мэргэжлийн Холбоодод эрхийг нь шилжүүлсэн байдаг. Үүний ард хариуцлага байх ёстой, бас маш том хөгжлийн гарц. Гэхдээ манайд бас л учир дутагдалтай асуудлууд бий. Мэргэжлийн холбоодыг салбар нь тодорхойлж чаддаг байх нь чухал. Хэрэгжүүлж буй үйл ажиллагаа нь  салбараа хир  төлөөлж чадаж байна, хир тунгалаг байна гэх мэт олон талаас нь харж дүгнэдэг байх. Түүнээс Мэргэжлийн Холбoо нэрийн дор бизнесийн байгууллага байж болохгүй, мөн энэ нэрийн дор хувийн эрх ашгийн тоглолт явагдаж болохгүй юм. Үүнийг салбар нь өөрсдөө дүгнэдэг, түүнийгээ дагаад эрх үүрэг шилжүүлэх асуудлаа шийддэг байх нь чухал юм шиг санагддаг. Түүнээс улс төржих хэрэггүй байгаа. Энэ асуудал дээр шинэчлэл хийгдсэн, зөв тогтолцоо гарч ирэх байх, цаг хугацааны асуудал байх.

-2015 онд НМХГазартай хамтран ажиллах санамж бичиг зурсан байдаг. Энэ санамж бичгийн хүрээнд хийж буй ажлуудаасаа танилцуулна уу?

Бид олон талаар хамтран ажиллаж байна. Сургалт, семинар, үзлэг шалгалт, стандартын хэрэгжилтийн идэвхжүүлэлт гэх мэт.
Барилгын цонхны чанар ярихын тулд түүнд хэрэглэж буй импортын материалын чанарыг ярихгүй байж болохгүй юм. Тиймээс өнгөрсөн жил НМХГазартай хамтран импортын материалын чанар аюулгүй байдал, мөн шилэн фасадан барилгын техникийн гүйцэтгэлд үзлэг шалгалт хийсэн.  Үйлдвэрлэгчид материалын сонголтод их алддаг учир энэ нь буцаад бүтээгдэхүүний чанарт сөргөөр нөлөөлдөг.Гэхдээ энэ дан ганц үйлдвэрлэгчийн асуудал биш захиалагчийн сонголт, мөн импортын материал нийлүүлэгч аж ахуйн нэгж байгууллагуудын хариуцлагын асуудал. Тиймээс энэ үзлэг шалгалтыг хийсэн, бид дотоодын зах зээлд хууль эрхзүйн зөрчилгүй үндэсний стандарт норм дүрмийн шаардлага хангасан үндсэн болон туслах материал зарж борлуулахыг иргэд, аж ахуйн нэгжүүдэд уриалж, түүний хэрэгжилтийг хангуулахын төлөө ажиллана.  

-Тэгэхээр гадуур зарагдаж буй хаалганы импортын материал стандарт норм дүрмийн шаардлага хангахгүй байна гэсэн үг үү? Мөн Нийслэлд баригдаж буй шилэн фасадан барилгын гүйцэтгэлд үзлэг шалгалт хийсэн гэж ярилаа, энэ талаар дэлгэрэнгүй мэдээлэл өгнө үү?

Бид холбогдох төрийн байгууллагуудтай хамтран 2015 оны 2, 4-р улиралд дээрх шалгалтуудыг шат дараалалтай хийсэн байгаа. Шалгалтын эцсийн дүгнэлтийг энэ 3-н сард олон нийтэд хүргэж, холбогдох газруудад мэдээлэл хүргэх болно. Тиймээс энэ асуултын хариултыг танай сэтгүүлд мэдээллэх болно. 

-Хийхээр төлөвлөсөн олон ажлаа амжилттай хэрэгжүүлээрэй. Таны ажилд амжилт хүсье.

Баярлалаа, та бүхний ажилд амжилт хүсье.