Объект: Байгалийн түүхийн музей
Санаачлан гүйцэтгэгч: “СаяСанаа” ХХК

     Замын түгжрэлд хэсэг саатахдаа өөрийн гэсэн өнгө төрх, уран нарийн хийцтэй атлаа анхаарал татахаа больсон, элэгдэж муудаад будаг шавар нь ховхорсон нэгэн барилгыг анзаарлаа. Манай улсын арвин баялаг түүх дурсгал, уламжлалт ахуй соёл, байгалийн өвөрмөц онцлогийг гадаадын жуулчид болоод өсвөр залуу үеийнхэнд таниулахад түүхэн чухал үүргээ нэр төртэй биелүүлсээр ирсэн “Бидний музей” эзгүйрч, хоосорсон мэт нэг л дүнсгэр харагдана. Ийм л дүр төрх сэтгэлд нэг л гуниг төрүүлж, уран бүтээлч бидний хэсэг залуусын анхааралд өртсөн юм.

     Үндэсний түүхийн музейгээ хүн бүр бахархан бахдаж, сонирхон үзэхээр зорьж, түүний дахин давтагдашгүй өвөрмөц гоёмсог барилгыг нь амнаас ам дамжин ярьж, алс холоос ирсэн гадныхны анхааран үздэг нэгээхэн чухал цогц үзмэр байгаасай гэсэн чин сэтгэлийн яриа бидний дунд өрнөж, Байгалийн түүхийн музейн энэхүү барилгаа сэргээн засварлах шинэхэн санаагаа цааснаа буулгасан юм.





     Их хотынхоо өнгө үзэмжинд чимэг нэмэн сүндэрлэж, Монголынхоо архитектурын онцлогийн нэгээхэн илрэл болсон барилга бүхий хүн бүрийн үзэх дуртай музей, очих дуртай газруудын нэг нь болж, "Энэ чинь Байгалийн түүхийн музей шүү дээ" гээд бүгдээрээ танидаг, мэддэг байгаасай гээд энэхүү загварыг бүтээлээ.

     “Хуучин бүхэн муухай байдаггүй, шинэ бүхэн сайхан байдаггүй” гэдэг дээ. Хуучин гээд аливаа бүхнийг үгүйсгэн нурааж, устгаж болохгүй. Харин ч сэргээн засварлаж, шинэчлэн сайжруулж, түүний үнэ цэнийг нэмэгдүүлж, хойч үедээ өвлүүлэн үлдээх нь уламжлал түүх соёлоо хадгалахын нэгэн чухал үндэс юм. Тийм ч учраас бидний хэсэг залуус энэ барилгыг орхигдсон, муудсан гэж адлан шүүмжлэхийн оронд засаж сайжруулаасай гэсэн үүднээс өөрсдийн санаачилгыг уриалга болгон гаргахыг хичээсэн юм.





     Загварыг гаргахдаа барилгын өөрийнх нь үндсэн хийцлэл, онцлогийг эвдэлгүйгээр засч сайжруулан, орчин үеийн хэв маягийг уусган шингээхийг зорилоо. Барилгын урд талбайд явган хүний зам байрладаг тул барилгын өргөтгөлийн нэг давхрын хэсгийг “Indoor street” буюу “Шилэн гудам” байлгахаар шийдсэн. Харин шилэн фасадыг төмөр хүрээ рам бүхий ганжуулсан шилээр гүйцэтгэхээр тооцоолж, загварыг гаргасан.

    Барилгын урд хэсгийн өргөтгөл доторх эртний эд өлгийн зүйлс, үзмэрүүдийг нарны хурц туяанд ил байрлуулах нь тохиромжгүй тул дуураймал үзмэрээр орлуулж тавина.

    Хотын төвөөр аялж яваа гадны жуулчин бүхэн заавал очиж үйлчлүүлдэг, халааснаасаа гар утсаа гаргаж ирээд “сэлфи” хийж Фэйсбүүк, Инстаграм хуудастаа оруулж, эх орныг минь сурталчилдаг онцгой барилга болгохыг хүссэн юм.


 

     “СаяСанаа” компанийн залуу уран бүтээлчид бидний зүгээс авьяас чадвар, бүтээлч сэтгэлгээ, шинийг хэрэгжүүлэх хүсэл мөрөөдлөө нийгмийн хариуцлагатайгаар улс орныхоо бүтээн байгуулалтын төлөө зориулахыг залуу үеийнхэндээ уриалж, Төр засагтаа уламжлахыг хүссэн нь энэ билээ.

     Өнөөгийн бид бүхний сайн мэдэх Байгалийн түүхийн музей 1924 онд “Үндэсний музей” нэртэйгээр анх байгуулагдан, 1930 онд одоогийн барилгад шилжин ирж, 1956-1991 онд Улсын төв музей, 1992 оноос “Байгалийн түүхийн музей” болжээ. Өдгөө энэ музейд газар зүй, геологи ашигт малтмал, ургамал-амьтны аймаг, палеонтологийн олдвор, хүн судлалтай холбоотой үзмэрүүд тавигдсан байдаг. Өөрөөр хэлбэл, энэ музей бидний түүх соёл, өв уламжлалыг илтгэсэн ихээхэн чухал үзмэрүүдийг агуулдаг цор ганц музей гэж хэлж болно.





     Уг нь музейн үйл ажиллагааг нь зогсоох Мэргэжлийн хяналтын байцаагчийн шаардлага 2013 онд гарснаар музейн олон нийтэд үйлчилдэг хэсгийг нурааж, оронд нь шинэ барилга барихаар болж, тухайн үед Соёл, спорт аялал жуулчлалын яам болон Эдийн засгийн хөгжлийн яамнаас хамтран бариулахаар болж байж. Харин санхүүжилтийг нь 2014 оны төсөвт суулгахаар төлөвлөсөн аж. Гэтэл музейгүйгээр бид дахин нэг зуныг өнгөрүүлэх нь дээ.

     Байгалийн түүхийн музейн шинэ барилгыг 2017-2018 онд ашиглалтад оруулахаар төлөвлөж, тендерээр “Балдан С” компани шалгарч, зураг төслийг нь хэдийнэ гаргаж дууссан гэдэг. Гэхдээ ердөө өнгөрсөн сард БНСУ-ын Засгийн газрын буцалтгүй тусламжаар тус музейн барилгыг барихаар болсон таатай мэдээ бидний сонорыг мялаалаа.



     Юутай ч аливаа бүхнээс ашиг горьдож хүлээх биш, алс ирээдүйдээ хэрэгтэй үнэт зүйлээ хайрлан хамгаалахах үйлсэд хувь нэмрээ оруулах Монгол залуу хүний нийгмийн хариуцлагаа ухамсарлаж, үлгэрлэн уриалсан санаачилгаараа Байгалийн түүхийн музейн барилгыг шинэчлэн засварлах санаагаа та бүхэнд хүргэж байна.
 

“СаяСанаа” ХХК
Холбоо барих: 88081494, 88006097
www.facebook.com/SaySanaaLLC