Барилга, хот байгуулалтын сайдаар Д.Цогтбаатарыг томилохоор яригдаж буй тухай эх сурвалжууд мэдээлж байна.
     
     УИХ-ын анхдугаар чуулганы нэгдсэн хуралдаанаар Засгийн газрын бүтэц бүрэлдэхүүний тухай хуулийн төслийг хэлэлцэн баталж, Шинэ Засгийн газар нь 13 яамтай, ерөнхий сайд, шадар сайд, ЗГХЭГ-ын сайд нарыг нэмээд нийт 16 сайд, 27 агентлагтай байхаар тогтсон билээ. 

     Шинээр батлагдсан бүтцийн дагуу 15 сайдын нэрийг Засгийн газар өргөн барьсан ч, олон нийтийн сүлжээгээр иргэдээс ихээхэн шүүмжлэл хүртэж, эсэргүүцэлтэй тулгарсан. Түүнчлэн Ерөнхийлөгч Ц.Элбэгдоржоос татгалзсан хариу авснаар  УИХ дахь МАН-ын бүлэг нэр дэвшүүлээд байсан сайд нараас дөрвөн хүний нэрийг эргүүлэн татсан юм. Тодруулбал, Эрчим хүчний сайд Ц.Цэнгэл, Хүнс, хөдөө аж ахуй, хөнгөн үйлдвэрийн сайд Ц.Анандбазар, Эрүүл мэндийн сайд Ж.Цолмон, Барилга, хот байгуулалтын сайд Д.Өнөрболор нарын нэрийг эргүүлэн татахаар болсон. Тэднийг ашиг сонирхлын зөрчилтэй гэж үзсэнээр ийнхүү нэрийг нь татсан гэдгээ тайлбарласан.

     Харин өдгөө БХБ-ын сайдаар дахин томилогдохоор нэр нь яригдаж буй Д.Цогтбаатарыг дэмжиж буйгаа олон нийтийн сүлжээ, Фейсбүүк, Твиттер хуудаст цөөнгүй хүмүүс илэрхийлсэн юм.