Монгол Улсын Ерөнхийлөгч Ц.Элбэгдорж,  Ерөнхий сайд Ж.Эрдэнэбат, Улсын Их Хурлын дарга  М.Энхболд танаа

БАРИЛГЫН САЛБАРЫН УДИРДЛАГЫН ТОГТОЛЦООНЫ ТАЛААР БИДНИЙ САНАЛ
Бид Монгол улсын барилгын салбарыг олон улсын жишигт нийцүүлэн хөгжүүлэхийн төлөө байнга санаа тавьж, ур чадвар мэдлэг туршлагаа хөгжүүлэн бусдад түгээж, гүйцэтгэж байгаа ажлынхаа хүрээнд хувь нэмрээ оруулсаар ирсэн билээ. 
Бид МАН-ын “Мэргэжлийн засгийн газар байгуулах” мөрийн хөтөлбөрийг талархан хүлээн авч, дэмжлэг үзүүлэн хамтран ажиллахад бэлэн байгаа тухайгаа барилгын салбарын төрийн бус байгууллагуудаар дамжуулан илэрхийлсэн билээ.
Гэвч Ерөнхий сайдын зүгээс Барилга Хот Байгуулалтын сайдад мэдлэг туршлага, мэргэшлийн хувьд тус салбарын бодлогыг тодорхойлж тулгамдсан асуудлуудыг оновчтой шийдвэрлэх мэргэжлийн мэдлэггүй хүнийг нэр дэвшүүлсэн явдал нь өмнөх засгийн газруудын алдааг давтаж, салбарыг бүхэлд нь бус зөвхөн нэг өнцгөөс харж байна гэж ойлгогдож байгаа тул дараах тайлбар болон саналуудыг хүргүүлж байна.
Мэргэжлийн бус, салбарын бус сайд томилогдох үед үүсдэг асуудлууд:
1.Салбарыг дутуу ойлгох
Томилогдсон сайдууд зарим нэг төрийн бус байгууллага, хувь хүмүүстэй уулзаж салбартай танилцахаас ажлаа эхэлдэг боловч энэ нь салбарыг бүрэн ойлгоход хангалтгүй, зөвхөн тухайн уулзсан этгээдүүдийн асуудал дээр төвлөрдөг.
2. Хугацаа алдсанаас ажил саатах
Салбартай танилцахын тулд хугацаа их зарцуулснаас тогтоол шийдвэр, дүрэм журмуудын биелэлт саатаж салбарын ажлыг зогсонги байдалд оруулсан. Зарим нэг хэрэгжүүлэгч агентлагууд өмнөх болон шинэчлэгдсэн хууль дүрэмтэй бүрэн танилцаагүй, шинэчилсэн найруулгад яг ямар өөрчлөлт орсон, юу хийх шаардлагатайгаа бүрэн ойлгоогүй байсаар хугацаа их алдсан. Жишээ нь: Барилгын тухай хуулийг хэрэгжүүлэх дүрэм журам, даргын тушаал гараагүй гэсэн шалтгаанаар олон төслүүдийн зураг төсөл баталгаажуулах ажил гацаанд орсон. 
3. Үндэсний зөвлөх инженеринг, төслийн удирдлага, мэргэжилтэй боловсон хүчнийг тасралтгүй хөгжүүлэх, сертификатжуулах бодлого хангалтгүй.
Монголын барилгын салбарт гадаад дотоодод мэргэжил эзэмшсэн чадварлаг боловсон хүчин олон байгаа боловч төрийн бодлого муугаас тэдгээрийн ажиллах боломж бүрдээгүй, дотоод нөөц бололцоогоо бүрэн судлаагүй. 
4. Үндэсний стандарт, норм дүрмийн шинэчлэл, хөгжлийн асуудлыг орхигдуулсан.
Хувийн хэвшлүүдийн зүгээс зах зээлд нэвтрүүлж буй гадаадын технологийг өөрийн орны онцлогт тохируулан баталгаажуулах тогтолцоо, бааз суурийг хөгжүүлэх асуудал орхигдсоноос шинэ сайн технологи баталгааждаггүй, мөн эсрэгээрээ Монгол орны онцлогт тохирохгүй технологоор алдаатай барилгууд баригдаж хэрэглэгчдийг хохироох явдал ихээр гарч байна.
5. Хот төлөвлөлтийн бодлого алдагдсан.
6. Чанарын хяналт, чанарын баталгааны бодлого алдагдсан.
Барилга угсралтын компаниудыг зэрэглэл, ур чадварын шалгуур үзүүлэлтийн  хэмжүүргүй, тусгай зөвшөөрлийг олноор олгосноор чадваргүй компаниуд үүсгэн байгуулагдаж стандарт бус барилгууд баригдаж барилгын салбарын нэр хүндийг нийтээр нь унагааж байна. 
Бидний санал:
1.    Барилга хот байгуулалтын сайдад тус салбарт ажиллаж байсан туршлагатай, төрийн байгууллагад ажиллаж байсан туршлагатай, мэргэжлийн эс бол эдийн засаг, хуулийн боловсролтой хүнийг томилох.
2.    Дэд сайд, төрийн нарийн бичгийн даргад мэргэжлийн хүн томилох
3.    Засгийн газрын хэрэгжүүлэгч агентлагуудын удирдлагад мэргэжлийн, тухайн салбарт 15-аас дээш жил ажилласан туршлагатай хүн томилох.
Уг саналыг Монголын барилгын инженер, архитекторуудын төлөөлөл хүргүүлж байгаа болно.  
Гарын үсэг:

       



        


















































































Салбарын удирдлагын тогтолцоо, одоо байгаа нөхцөл байдлыг шинжлэн дүгнэлт хийж, салбарын сайд болон холбогдох төрийн байгууллага, агентлагын удирдлагуудад Барилга.МН сэтгүүлийн зүгээс хэд хэдэн санал, санаачлага гаргасныг 75 дахь дугаар /8дугаар сар/-аас хүлээн авч уншаарай.