Алдарт архитектор Заха Хадидын экологид сөрөг нөлөөгүй, эрчим хүчний хэмнэлттэй нэгэн шинэ цамхаг Австралийн Мелбурн хотноо сүндэрлэхээр болжээ. Хүн амьдрахад хамгийн таатай бүс хэмээн нэрлэгддэг энэ хотын Бизнесийн гол дүүрэгт Коллинз 600 гудамжинд энэхүү барилгыг байгуулах аж. Энэ нь 178 метр өндөр, 54 давхартай байх ба 420 айлын орон сууц, оффисийн хэсэг, худалдааны танхим, олон нийтэд зориулсан үйлчилгээний хэсгээс бүрдэх юм. Шовгор ваар мэт хэлбэр дүрстэй уг барилгын өвөрмөц фасад тус бүр нь өөр өөр элементийг агуулах аж.

     Цамхагийн эдгээр сонин хэлбэртэй фасад нь нарны хурц туяаны тусгалыг багасгаж, барилгын дотор хэсгийг сэрүүн байлгах зориулалттай. Өндөр үзүүлэлт бүхий цонхны шиллэгээ, хөргөх систем, ухаалаг эрчим хүчний гэрэлтүүлэг, саарал усыг дахин ашиглах систем зэрэг нь байгалийн нөөц баялгийн болоод эрчим хүчний хэрэглээг хэмнэх давуу талтай.

    Олон нийтэд зориулсан хэсэгт худалдаа үйлчилгээний төв, террас, Southern Cross галт тэрэгний буудалтай холбогдсон явган хүний зам багтана. Мөн автомашины клуб, цахилгаан тээврийн хэрэгслийн тавцан, 350 дугуйны зогсоолтой ажээ.