Мехико хотод эрчим хүчний хэмнэлттэй, газар хөдлөлтөд тэсвэртэй гайхалтай бат бөх нэгэн өндөр барилгыг барихаар төлөвлөжээ. “Arup” компанийн гүйцэтгэж буй уг барилгад “LEED Platinum Core and Shell” гэрчилгээ бүхий өндөр барилгад зориулсан 3 талт бетоныг ашигласан байна. Гадны нөлөөлөл, хүчтэй салхи шуурга, газар хөдлөлтөд бүрэн тэсвэртэй байхаар барьж гүйцэтгэсэн энэ төслийн ашиглалтын хугацааг 2,500 жил гэж тооцоолж байгаа аж.

     Нүд булааж, анхаарал татам өвөрмөц гурвалжин хэлбэртэй энэ барилга Мехико хотын хоёр дахь өндөр барилгад тооцогдож байгаа. Барилгын гадна талын гоёмсог гялалзсан фасадыг суналтын “Давхар-V” тусгай гогцоогоор тогтоожээ. Барилгын үзэмжийг төгс харагдуулахын тулд архитекторууд дотор заслыг өндөр таазтай, баганагүй байхаар тооцоолж, олон тооны орох гарах шат болон 35 цахилгаан шатыг төлөвлөсөн байна. Ингэснээр Латин Америкийн хамгийн олон цахилгаан шаттай барилгад тооцогдож байгаа аж.

     Төслийг гүйцэтгэгчид “Torre Reforma” барилгыг өндөр барилгын хувьд газар хөдлөлтөд хамгийн их тэсвэртэй, бат бөх, дизайны хамгийн шилдэг хийцтэй болсноороо дэлхийд алдартай гоёмсог барилгуудтай эн зэрэгцэнэ хэмээн мэдэгдэж байгаа юм. Барилгын хамгийн гол үзүүлэлт нь түүний ашиглалтын хугацаа гэдгийг тэд онцолж байна. Барилгын бетон хана нь нарны хурц туяанаас хамгаалж, дотор температурыг зохицуулахын зэрэгцээ борооны усыг хуримтлуулан дахин ашиглах технологийг нэвтрүүлсэн гээд олон талын ашигтай хэрэглээг бүрдүүлж чаджээ.