“Зүүн хойд Азийн хотуудын дарга нарын форум “Хотын ногоон өсөлт-Эрчим хүчний ногоон шийдлүүд” сэдвийн хүрээнд Улаанбаатар хотноо  3 дахь жилдээ болж байна. Өчигдөр форумын хүрээнд Их эзэн Чингис хааны нэрэмжит талбайд “Хотын ногоон шийдлүүд-2016” үзэсгэлэн нээлтээ хийлээ.

Үзэсгэлэнд үндэсний 48 аж ахуйн нэгж оролцон, Эко эрчим хүч, Эко цахилгаан дулаан, Эко тээвэр, Эко үйлдвэрлэл зэрэг сэдвээр бүтээгдэхүүн, шийдлээ танилцуулж байна. Үзэсгэлэн болон форумд оролцохоор Зүүн хойд Азийн хотуудын 20 гаруй төлөөлөгчид хүрэлцэн ирсэн байлаа. 

Азийн сангийн Байгаль орчны хөтөлбөрийн захирал Ким Де Ридер хэлсэн үгэндээ “Улаанбаатар хотод Зүүн хойд Азийн хотуудын дарга нарын форумыг 3 дахь жилдээ хамтран зохион байгуулж байгаадаа баяртай байна. Урьд жилүүдийн форумаар хотын ногоон хөгжил, өсөлтийн талаар хотууд санал солилцож туршлага хуваалцаж байсан бол энэ жил "Хотын ногоон хөгжил-Эрчим хүчний ногоон шийдлүүд" сэдвээр зохион байгуулж байна.  Энэ  форум нь бүс нутгийн ногоон хөгжлийн асуудлыг шийдэхэд чухал нөлөө үзүүлэх төдийгүй дэлхийн уур амьсгалын өөрчлөлтийн эсрэг дуу хоолойгоо нэгтгэж, эх дэлхийгээ аврах үйлсэд хувь нэмрээ оруулж буй хэрэг юм” гэж онцоллоо. 

Харин Эрчим хүчний зохицуулах хорооны Эрчим хүчний хяналтын хэлтсийн дарга Ц.Атаржаргал “Манай хорооноос ногоон хөгжил, сэргээгдэх эрчим хүчний чиглэлээр шаардлагатай бүх арга хэмжээг авч, ажиллаж байна. Үүний нэг жишээ нь сэргээгдэх эрчим хүчний дэмжих тарифыг баталсан. Монгол Улсын эрчим хүчний нийт суурилагдсан хүчин чадлын найман хувийг сэргээгдэх эрчим хүч эзэлдэг. Үйлдвэрлэлийн салбарт энэ тоо 2-3 хувьтай байна. Төрөөс эрчим хүчний талаар баримтлах бодлогод 2020 онд сэргээгдэх эрчим хүчний суурилагдсан хүчин чадлыг 20 хувьд хүргэнэ гэсэн том зорилтыг дэвшүүлсэн байгаа” гэлээ. 




          Зүүн хойд Азийн хотуудын дарга нарын форум өнөөдөр Туушин зочид буудлын Соёмбо танхимд болж байна.