Өнөөдөр Монгол Улсад барилгын салбар үүсч хөгжсөний 90 жил болон Барилгын зураг төслийн байгууллагын мөн 90 жилийн ойн баярын хүрээнд зураг төслийн байгууллагын экспертүүдийн зөвлөгөөн боллоо. Зөвлөгөөний ерөнхий зохион байгуулагчаар Барилгын Хөгжлийн Төв болон БЗТЗХ ажилласан бөгөөд Барилга хот байгуулалтын яам болон бусад холбогдох байгууллагууд дэмжин оролцсон юм.

Хурлыг БХТ-ын Магадлалын хэлтсийн дарга Г.Мөнгөнхуяг даргалж, Магадлалын ажлын өнөөгийн байдал, Нийслэлийн ерөнхий төлөвлөгөөний газраас хэрэгжүүлж буй зорилт төлөвлөлт, нийслэлийн зураг төсөл, газар зохион байгуулалтын төлөвлөлт, Зургийн байгууллагын үүсэл хөгжил, BIM-ийг дэмжигч программаар боловсруулсан загвар төсөл зэрэг сэдвээр холбогдох мэргэжилтнүүд илтгэл тавьж, танилцууллаа.

Хурал дээр яригдсан зарим анхаарал татсан асуудалд, барилгын зураг төслийн чанарыг дээшлүүлэх чиглэлээр хийгдсэн ажлын жагсаалт, бэрхшээлийн талаар хөндөгдсөн юм. Тухайлбал, төсөв хийх болон магадлал хийх явцад төхөөрөмжийн зардлыг шууд зардалд оруулж ашгийг нь тооцдоггүйгээс тухай төсөл ашиггүй болох хүндрэл учирдаг мөн барилга угсралтын ажлын төсөвт өртгийг зохиох, түүнд хийх магадлалын арга зүйг өөрчлөх эрхзүйн орчинг өөрчлөх шаардлагатай зэрэг зураг төсөл, эксперт хийхэд гарах хүндрэлүүдийн талаар яригдсан.

Түүнчлэн зөвлөгөөний үеэр зураг төслийн үүх, түүхийг харуулсан гараар зурдаг байх үе, Автокод систем ашиглаж эхлэх үе болон BIM-ийн талаар танилцуулсан үзэсгэлэн гарсан байлаа.

Ингээд дээрх үйл явдлын талаарх фото зургийг сонирхоно уу.
 
Барилгын салбарт хүчин зүтгэгч аж ахуйн нэгж, албан хаагчид, нийт барилгачиддаа барилгын салбар үүсч хөгжсөний 90 жил болон Монголын хөрсөнд зураг төслийн байгууллага байгуулагдсаны түүхт 90 жилийн ойн баярын мэндийг barilga.mn сайтын зүгээс дэвшүүлж байна. Та бүхэнд баярын мэнд хүргэе.