Хийж бүтээснээрээ бахархаж явна гэдэг хүний амьдралд тохиолдох нэн сайхан баяр баясгалан байдаг. Тийм хувь заяа Монголын барилгын салбарын үе үеийн барилгачид бидэнд оногддог.

     Одоогоос 90 жилийн тэртээ Монгол Улсын нийслэл нь “Эсгий хотхон” хочтой байх тэр цагт, зөвхөн бурхан шашны зориулалттай сүм хийдүүдээс өөр барилгажсан жижигхэн боловч суурин нэгээхэн ч байсангүй. Тиймээс барилгын мэргэжлийн хүмүүс, өөрсдийн үйлдвэрлэсэн, хийсэн барилгын гэх материал ч байгаагүй нь мэдээж.

     Тийм л түвшингөөс 20-р зууны 20-иод оны нэн ихээр хоцрогдсон Монгол орноо өөрчлөн, өнгө төрхийг шинэчлэх, сэргэн мандалт, ард түмнийхээ нийгэм соёлын ахуй орчинг дээшлүүлэх амаргүй хүнд бэрхшээлтэй их үйлсийн эхлэлийг тавилцаж, хөдөлмөрлөж зүтгэсэн хүмүүс нь манай барилгачид билээ. Тухайн үеийн төр, засгийн зорилго нь ч энэ байсан учир “Барилга” гэж юу болох, яаж барих, юунаас нь эхлэх, барилгын төрөл бүрийн анхны, үндэсний мэргэжилтнүүдийг хэрхэн, ямар үе шаттайгаар бэлтгэх вэ гэсэн бодлого нь чухамхүү эх оронч ухаан, сэтгэл, итгэл зүтгэлийн илэрхийлэл болж, биелэлээ олж хэрэгжсэн юм. Иймээс энэ салбарын юм бүхэн нь “О”-ээс эхэлсэн билээ. Тэгвэл өнөөдрийн өндөрлөгөөс туулж өнгөрүүлсэн 90 жилийнхээ хөгжил дэвшлийн түүхийг эргэн харахад баатарлаг их үйлсийн эзэд болсон үе үеийн барилгачиддаа үнэхээр баярлан, бахархаж баршгүй.

     Монгол Улсын барилгын анхны үйлдвэр, барилгын анхны инженер, анхны архитектор, барилгын төрөл бүрийн мэргэжлийн анхны ажилчид, өөрсдийн анхны зохиосон зураг төсвөөр, өөрсдийнхөө хийж, үйлдвэрлэсэн анхны материалаар, өөрсдийн гараар барьсан анхны томоохон барилга гээд анхдагч болоод ууган бүгдийгээ дурсаж, түүнээс хойших он жилүүдэд Монгол Улсын нутаг дэвсгэр дээр урьд өмнө огт байгаагүй 20 гаруй томоохон хот, 400 гаруй сууринг бий болгож чадсанаас гадна өнөөгийн Улаанбаатар нийслэл хотоо бас тасралтгүй барьж, бүтээн байгуулалт хийсээр өдий зэрэгт хүргэлээ.

     Энэ бүгд нь бидний улс, үндэстний бахархал юм. Ер нь барилгын зураг төсөл нь оюун ухаан шаардсан уран бүтээл, барилга барих нь ур чадвар, дадлага туршлага, тэсвэр хатуужлын бахархах үзүүлэлт, барилгын материалын үйлдвэрлэл нь өвөрмөц хүнд аж үйлдвэрийн хөгжлийн бас нэгэн үзүүлэлт байдаг. Энэ бүхэн нийлж байж манай салбарын хөгжлийн үзүүлэлт болдог. Барилгын салбарын оролцоогүйгээр өөр ямар ч салбарын хөгжил дэвшил иж бүрэн цогцоор биелэгдэхгүй. Тиймээс манай улсын барилгын салбарын үүсэл, хөгжлийн 90 жилийн түүхт ойн баяр нь зөвхөн барилгачдаар хязгаарлагдахгүй, бүх ард түмний маань бахархах баяр билээ.

     Энэ сайхан баярын мэндийг барилгын салбарынхаа үе үеийн нийт ажиллагсдадаа болон энэ салбарын мэргэжилд суралцаж буй бүх хүмүүст хүргэж, ажил хөдөлмөрийн өндөр амжилт, амьдралын баяр баясгалан бүхнийг та бүхний унших дуртай "Барилга.МН" сэтгүүлийн хамт олон болон хувиасаа хүсэн ерөөж мэндчилье.



    "Барилга.МН" сэтгүүлийн эрхлэгч МУ-ын Зөвлөх инженер Ч.Баатарсүрэн