Арилжааны банкнууд өнгөрсөн долдугаар сард нийт 1592 зээлдэгчид 92.8 тэрбум төгрөгийн ипотекийн зээл шинээр олгосон талаар Монголбанк мэдээллээ.

Мөн дахин төлөвлөлтөд хамрагдсан байршлаас 596 иргэнд 26.4 тэрбум төгрөгийг 5 хувийн хүүтэй олгосон байна. Түүнчлэн 117 зээлдэгчдийн 5.2 тэрбум төгрөгийн зээлийг 8-аас 5 хувь руу шилжүүлжээ. Ингэснээр зээлдэгчийн тоо 85622 болж, ипотекийн зээлийн үлдэгдэл 3 их наяд 856.3 тэрбум төгрөгт хүрчээ.

Ипотекийн зээлийн үлдэгдлийн жилийн өсөлтийн хурд өмнөх сартай харьцуулахад 0.3 нэгж хувиар өссөн бол өмнөх оны мөн үеэс 10.3 нэгж хувиар буурчээ.

Нийт зээлийн үлдэгдлийн 77.7 хувь буюу 2 их наяд 995.8 тэрбум төгрөгийг “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээлийн эх үүсвэрээр санхүүжүүлсэн байна. Харин 20.7 хувь буюу 799.3 тэрбум төгрөгийг банкууд өөрийн эх үүсвэрээс олгосон бол 1.6 хувь буюу 61.2 тэрбум төгрөгийг бусад эх үүсвэрээс санхүүжүүлжээ.

Ипотекийн зээлийг албан ёсоор зогсоох мэдэгдэл гаргаагүй ч одоогоор арилжааны банкнуудаар олгогдохгүй байгаа. Цаашид энэ зээлийг үргэлжлүүлэх хэрэгтэй эсэх талаар улс төрчид, эдийн засагчид маргаантай байна. Гэхдээ ихэнх эдийн засагчдын хувьд санхүү, мөнгөний бэрхшээлтэй, Засгийн газраас хэмнэлтийн бодлого барьж буй энэ үед ипотекийн зээлийг зогсоовол банкны салбар болоод улсын эдийн засагт хэрэгтэй гэлцэж буй. Харин БХБЯ-наас цаашид үргэлжлүүлнэ гэсэн мэдээлэл гарсан билээ.