Барилгын салбарт ажиллаж, аж ахуйн нэгж байгууллага удирдан, төсөл хөтөлбөр хэрэгжүүлж, олон олон ажлын байрыг бий болгож буй салбарын удирдлага та бүхэнд зориулсан “Барилгын салбарын зах зээлийн судалгаа, цаашдын чиг хандлага” сэдэвт удирдах ажилтнуудын уулзалт семинарыг зохион байгуулах гэж байна.

            Төслөө үр ашигтай борлуулах, үл хөдлөх хөрөнгөө үнэгүйдэхээс аврах, ажилтан албан хаагчдаа тогтвор суурьшилтай ажлын байраар хангах, газрын зөвшөөрөл, барилга барих тусгай зөвшөөрлөө хүнд суртал гэгч өндөр босгогүйгээр олж авах, хөрөнгө оруулалт босгох, барилгын салбарт макро эдийн засгийн үзүүлэх нөлөө гээд удирдах албан тушаал хашиж буй хэн бүхэнд хэрэгтэй үнэт зөвлөмж, судалгаанд тулгуурласан бодит мэдээллийг хүргэх энэхүү уулзалт нь 2016 оны 5-р сарын 25-ны өдөр 10:00 цагт МҮХАҮТанхимд болно.

            Семинарт Барилга, хот байгуулалтын Сайд З.Баянсэлэнгэ төр засгаас хэрэгжүүлж буй бодлого шийдвэрүүдийн талаар танилцуулж, “Барилга Эм Эн” ХХК-ийн Ерөнхий захирал Г.Батсүх “Барилгын салбарын өнөөгийн байдал, цаашдын чиг хандлага”, сэдвээр “Барилга Эм Эн” ХХК-ийн Судалгааны албаны дарга Б.Билэгтсайхан “Үл хөдлөх хөрөнгийн зах зээл, үнийн өөрчлөлт”, МБМҮХолбооны Гүйцэтгэх захирал О.Лхагвадорж “Барилгын материалын зах зээл” сэдвүүдээр тус тус сонирхолтой илтгэл тавина.

            Зөвхөн илтгэлийн сэдвүүдээр хязгаарлагдахгүй, уг уулзалтад DeFacto Д.Жаргалсайхан, Доктор Ч.Хашчулуун, МБҮА-ийн Ерөнхийлөгч Б.Нэмэхбаатар зэрэг эдийн засагч, судлаач, барилгын салбарын арвин туршлагатай МУ-ын Зөвлөх инженерүүд, дулаан шугам сүлжээний инженер, удирдах албан тушаалтнууд оролцож, үл хөдлөх хөрөнгийн бизнес эрхлэгч, барилга угсралтын ажил гүйцэтгэгч, төсөл хэрэгжүүлэгч аж ахуйн нэгжүүдийн удирдах ажилтнуудтай санал бодлоо солилцон, хэлэлцүүлэг өрнүүлэх юм.

        Тухайлбал, төлбөрийн чадвартай эрэлт буурсан энэ үед ямар төрлийн орон сууц тохирох, барилгын салбарт даатгалын үйлчилгээг яагаад чухалчлах болсон, Дэлхийн банкны эдийн засагчид зах зээлийг хэрхэн дүгнэж байгаа, харилцагч түншүүдээ алдахгүйн тулд юу хийх ёстой, барилгын материалын дотоодын үйлдвэрлэл, газрын үнийн хөөсрөлт, Улаанбаатар хотод дулааны хангамжийн дутагдал хэзээ нүүрлэх, уул уурхайн салбар барилга, үл хөдлөх хөрөнгийн салбарт хэрхэн нөлөөлөх гээд олон чухал сэдвийг хөндөн ярилцана.

            Барилга орон сууцны зах зээлийн өнөөгийн байдлыг бодитоор дүгнэн хэлэлцэж, эдийн засгийн аливаа хүндрэл бэрхшээлийг даван туулж, бизнесийн энэхүү салбарт урт удаанаар оршин тогтнож, бизнесийн үндэс сууриа бат бэх болгоход тань бага ч гэсэн тус дэмжлэг болох энэхүү уулзалт семинарт хүрэлцэн ирэхийг урьж байна.

Зохион байгуулагчид: БХБЯам, МҮХАҮТ-ын дэргэдэх Барилга, Дэд бүтцийн зөвлөл, МБҮА, МБМҮХ, “Барилга Эм Эн” ХХК, “Орон сууцны бирж”
 Хэзээ: 2016 оны 5-р сарын 25-ны өдөр 10:00 цагт
Хаана: МҮХАҮТанхимын 507 тоот
Оролцогчид: Барилгын салбарын бизнес эрхлэгчид, удирдах ажилтнууд, судлаачид
Холбоо барих: 70113333, 80553333, 99058841
www.sudalgaa.barilga.mn