Энэ онд Ирээдүйн тэтгэврийн нөөц сангийн тухай хууль батлагдан Засгийн газар, Монголбанк хамтран хэрэгжүүлж буй “Орон сууцны санхүүжилтийн тогтвортой тогтолцоог бүрдүүлэх хөтөлбөр”-ийн хүрээнд орон сууцны ипотекийн санхүүжилтийн үйл ажиллагааг эрчимжүүлэн таван хувийн зээл олгож эхлээд буй. Үүнд, Улаанбаатар хотын гэр хорооллын дахин төлөвлөлтийн хүрээнд хамрагдах орон сууц, хотын алслагдсан дүүргүүд болох Багануур, Багахангай, Налайх болон нийслэлийн шинэ суурьшлын бүс, 21 аймгийн нутаг дэвсгэр дэхь орон сууц хамрагдаж байгаа юм. Ийнхүү зээлийн хүү нь таван хувь болж буурна гэдэг олон давуу талтай. Наад зах нь хөдөө, орон нутгийн дэд бүтцийг дэмжих, хотын төвлөрлийг бууруулах, утааг багасгах гэх зэрэг олон зорилтууд бий. Тэрхүү зорилтуудтай ч бас уялдаатай, нийцэж ажиллах механизм юм.

         Гуравдугаар сард банкууд нийт 1344 зээлдэгчдэд 82.3 тэрбум төгрөгийн ипотекийн зээл шинээр олгосноор нийт зээлдэгчдийн тоо 81015-д хүрээд байна. Үүнээс таван хувийн хүүтэй 11.0 тэрбум төгрөгийн зээлийг 252 зээлдэгчдэд олгосон. Харин найман хувиас таван хувь руу 625 зээлдэгчийн 25.3 тэрбум төгрөгийн орон сууцны ипотекийн зээлийн хүүг шилжүүлжээ.
 
Нэг зээлдэгчид ногдох олгосон зээлийн хэмжээ мөн гуравдугаар сарын байдлаар 61.3 сая төгрөг байна.