"Барилга.МН" сэтгүүлийн тавдугаар сарын ээлжит дугаар худалдаанд гарлаа. Өмнөх сард “Амины орон сууцны хийц бүтээц, зөвлөмж”-ийг онцолж байсан бол энэ удаад иргэдийн хүсэлтээр дахин энэ сэдвийн хүрээнд зөвлөгөө, зөвлөмж, тооцоо судалгааг түлхүү багтаалаа. Тухайлбал,

Дугаарын зочин буланд Стандартчилал, хэмжилзүйн газрын дарга Г.Гантөмөрийг урьж, салбарт нэвтрүүлж буй Евро стандартын талаар ярилцсан юм.

Энэ сарын “Хөндөх сэдэв”–ээр бүтээн байгуулалт ид өрнөж эхлэж байгаатай холбогдуулан Гэр хорооллын дахин төлөвлөлтийн төслийн яг одоогийн явц, байдлын талаар “Нэгдэн нийлнэ гэдэг нийт ажлын 90 хувь” хэмээн онцлон бичлээ. Төр засгийн шийдвэр, тогтоол, төсөл, хөтөлбөр зэрэгт мэргэжлийн суурь судалгаа илт дутагдаж байдаг нь олон зүйлээс илэрдэг. Үүний нэг нь гэр хорооллын дахин төлөвлөлтийн төсөл юм. Энэхүү төсөл бараг зогсонги байдалд ороод буй. Энэ талаарх баримт, судалгаатай бичсэн нийтлэлийг уншигч танд хүргэж байна.

“Барилга Эм Эн” ХХК-ийн Судалгааны албанаас “Будагны хэрэглээний зах зээл”-ийг онцлон, тойм мэдээллийг хүргэжээ. Монгол Улсын импортын будагны зах зээл, үнэ ханшийн мэдээллийг багтаасан энэ судалгааг уншигч танд хүргэж байна.



Түүнчлэн Барилгын Сургалт, Хөгжлийн Академийн УЗ-ийн Дарга, ШУТИС-ийн Барилга, архитектурын сургуулийн пропессор, шинжлэх ухааны доктор, академич Д.Дашжамцтай хийсэн ярилцлагыг уншиж сонирхоорой. Тус академи нь бизнес эрхлэгч аж ахуйн нэгж байгууллага, ажилтнуудын бизнесийн болон мэргэжлийн чадавхыг дээшлүүлэхэд дэмжлэг үзүүлэх төдийгүй салбарын бодлого, хэрэгжилт, үйл явц, судалгаа, дүгнэлт зэрэг сэдвийн хүрээнд холбогдох бичиг баримт боловсруулах, хурал, семинар зохион байгуулах чиглэлээр ажилладаг билээ. Дашрамд дурдахад, Академийн тавдугаар сарын 08-нд болсон “Төслийн менежмент” сургалтыг “Үндэсний ухаан” хөтөлбөрийн санаачлагч Менежментийн үндэсний зөвлөх, Удирдлагын академийн ахлах багш, Төслийн удирдлага, хөгжлийн хүрээлэнгийн тэргүүн, сүүлийн үеийн бэйст сэйллер 50 менежмент "Удирдахуйн ухаан" номын зохиогч Ц.Өнөржаргал хөтлөн явуулсан нь олон иргэдийн талархлыг хүлээгээд буй.

Хуулийн булан. Хууль эрхзүйн туслалцаа, зөвлөмж гэдэг хэзээд эрэлттэй байдаг. сэдэв Сэтгүүлийн 72 дахь дугаарт Газар өмчлөх, ашиглах эрхзүйн орчны талаарх мэдээллийг бэлтгэжээ. “Газрын тухай” хуульд орсон нэмэлт өөрчлөлтүүд, газар өмчлүүлэх, эзэмшүүлэх, ашиглуулах дуудлага худалдаа явуулах, төсөл сонгон шалгаруулах журам зэргийн талаар багц мэдээлэл оржээ. Үүнтэй холбоотойгоор иргэн танд асуулт байвал үнэ төлбөргүйгээр бид тодруулж өгөх болно.
 

Салбарын ажилтан, мэргэжилтнүүдэд зориулсан “Мэргэжилтний үг” буланд Өвөр Монголын “Луншин Вей-Е” үл хөдлөх компанийн ерөнхий захирал Лю Гэн Жү-тэй хот төлөвлөлтийн талаар сэтгүүлч Б.Бурмаагийн ярилцсан сонирхолтой ярилцлагыг хүргэж байна.

Тэрээр барилгын салбарт амьдралынхаа 30 гаруй жилийг зориулж, Өвөр Монголын томоохон компанийн захирал болтлоо дэвшиж чадсан эрхэм билээ. Монгол Улсын бүтээн байгуулалтын төлөө санаа зовниж, үргэлж анхаарал тавьдаг нь түүний хийж, хэрэгжүүлсэн ажил, хэлэх үг бүрээс мэдрэгдэж байсан бөгөөд "Хот төлөвлөлтийг үндэсний онцлогтойгоо уялдуулаасай" хэмээн өгүүлсэн нь сэтгэлд үлджээ.



“Интерьер” бол манай сэтгүүлийн өнгө төрх, нүд баясгам булан юм. “Ред-Арт” ХХК-ийн Дизайнер Хүрэлбаатарын Баярцэнгэлийн урласан амины орон сууцны загварыг танилцууллаа. Бид үндэсний бүтээн байгуулалт, салбарын гэгээлэг мэдээлэл бүхнийг дэмжин ажилладаг бөгөөд үүний нотолгоо болгож, салбарт гарсан ахиц дэвшил, хөрөнгө оруулалт, иргэдэд эрэлт хэрэгцээтэй мэдээ, нийтлэлийг үнэ төлбөргүй оруулдаг. Үүний нэг нь Монгол хүний ур ухаанаар бүтсэн интерьер заслыг танилцуулдаг “Интерьер” булан билээ.



“Сошиал ертөнц” булан нь “Барилга.МН” сэтгүүлийн отгон булан. Гэсэн ч барилгын жиргээ, нүүр хуудасны онцлогийг толилуулдаг булан маань аль хэдийн жиргээчид, фэйсбүүкчдийн танил болжээ. Тэднээс энэхүү буланд багтах гэсэн санал, барилгачдын яриа, "Barilgamn" пэйж хуудсанд ирэх талархлын үгс зэргээс харагдана.  

Ингээд "Барилга.МН" сэтгүүлээ уншиж, үргэлж хамт байдаг уншигч та бүхэнд баярлалаа. Дахин нэг уншвартай мэдээ мэдээллээр баялаг сэтгүүлийн маань шинэ дугаар таны гарт очиж байна. Эцэст нь сэтгүүлд материалаа нийтлүүлэх сонирхолтой иргэн, аж ахуйн нэгж бүрийн өмнө бидний үүд хаалга үргэлж нээлттэй гэдгийг дуулгая.