“Нийслэлийн орон сууцны корпораци” орон нутгийн өмчит аж ахуйн тооцоот үйлдвэрийн газрыг хаалттай хувьцаат компани болгон өөрчилж, гэр хорооллын дахин төлөвлөлтийн төслүүдийг санхүүжүүлэх үнэт цаас гаргах зэрэг асуудлыг НИТХ-ын Тэргүүлэгчдийн ээлжит хуралдаанаар баталж, шийдвэрлэлээ.

     “Нийслэлийн Орон сууцны хөтөлбөр”-т тусгагдсан арга хэмжээнүүдийг хэрэгжүүлэхэд шаардлагатай хөрөнгө оруулалтын эх үүсвэрийг шийдвэрлэх, гэр хорооллын дахин төлөвлөлтийн төсөл хэрэгжүүлэгч аж ахуй нэгж байгуулагуудад шаардлагатай байгаа санхүүжилтийг шийдвэрлэх зорилгоор үнэт цаас гаргах шаардлагатай болсон. Тэр дундаа гэр хорооллын дахин төлөвлөлтийн төслүүдийг хэрэгжүүлэхийн тулд эдгээр төслүүдийг санхүүжүүлэх үнэт цаас гаргах нь чухал байгааг онцоллоо. Эдийн засгийн нөхцөл байдлаас шалтгаалаад арилжааны банкууд барилгын салбарт олгох зээлээ зогсоосон, санхүүжилтийн эх үүсвэр дутагдалтай байгаа учраас барилгын ажил удааширсан тухай НЗД-ын Хот байгуулалт хөрөнгө оруулалтын асуудал хариуцсан орлогч С.Очирбат танилцуулсан юм.

      Нийслэлийн хэмжээнд 9 нэгж талбарт газар шинэчлэн зохион байгуулах төсөл хэрэгжихээр байршлыг баталсан бол, гэр хорооллын дахин төлөвлөлтийн хүрээнд 19 төсөл хэрэгжүүлэгч 3400 гаруй айлын орон сууцыг ашиглалтад оруулахаар ажиллаж байна. Төслүүдийг хэрэгжүүлэхэд нийт 117 тэрбум төгрөгийн санхүүжилт шаардлагатай байгаа учраас энгийн хаалттай үнэт цаас гаргах замаар санхүүжилтийг шийдвэрлэх боломжтой гэж тооцжээ.

    Тиймээс Нийслэлийн Орон сууцны корпораци /НОСК/-ийг хаалттай хувьцаат компани болгон өөрчлөн байгуулж, НОСК-ийн нэрээр үнэт цаас гаргах асуудал дэмжигджээ. Ингэснээр арилжааны банкууд НОСК-ийн үнэт цаасыг худалдан авч, барилгын компаниудад хөнгөлөлттэй нөхцөлөөр зээл олгох боломж бүрдэх юм.