Үйлдвэрлэл, практик, бизнесийн салбарт нэвтрүүлэх боломжтой, байгаль дэлхийд ээлтэй техник технологи, дэвшилтэт бүтээгдэхүүн, шинэ санаа санаачилга, шийдлүүдийг шийдвэр гаргах түвшний болоод хөрөнгө оруулагчид, худалдан авагчдад таниулах, аливаа хамтын ажиллагааг сайжруулах, түншлэлийн холбоог дэмжих зорилготой “Ногоон технологи-Инноваци 2016” үзэсгэлэн өнөөдөр МҮХАҮТ-д эхэллээ.

     Үзэсгэлэнд эрчим хүчний хэмнэлтэт, экологид ээлтэй, хүний аюулгүй, эрүүл амьдрах нөхцөлийг бүрдүүлсэн, хаягдлыг дахин ашигласан, нөхөн сэргээгдэх боломжтой бүтээгдэхүүн, үйлчилгээгээ сурталчилж үндэсний 60 гаруй компани оролцож байгаа юм. Тухайлбал, барилгын салбарт усан халаагуур, нам даралтын зуух, Лед гэрэл, нарны эрчим хүчний үүсггүр хавтан, хонины ноосон барилгын дулаалгын материал, резин хавтан, ус цэвэршүүлэгч төхөөрөмж, евро блок, сэргээгдэх эрчим хүчний эх үүсвэр болох агаарын дулааны насос, цахилгааны хэмнэлттэй халаалтын цогц шийдэл, гэрийн ухаалаг төхөөрөмжийн иж бүрдлийг нэвтрүүлэгчдийн талаарх өргөн мэдээллийг та бүхэн авах боломжтой. Мөн эм, нэмэлт тэжээл, эмчилгээний бүтээгдэхүүн, эко цаас болон цаасан бүтээгдэхүүн үйлдвэрлэгчид, гоо сайхан, ахуйн хэрэглээний эрүүл, цэвэр бүтээгдхүүнүүдийн мэдээллийг нэг дороос хүлээн авах боломжийг ногоон технологийг танилцуулагч тус үзэсгэлэнгээс танилцаарай.

     Ногоон бизнес эрхлэгчид, шинийг санаачлагчид, ногоон инноваци технологийг хөгжүүлэгчид, хөрөнгө оруулагчид, бодлого боловсруулагчид, бизнесийн байгууллагуудыг өргөнөөр оролцуулсан энэ үзэсгэлэнг БОНХАЖЯ, МҮХАҮТ, ШУТИС, МИХ хамтран зохион байгуулж байна.

     Мөн үзэсгэлэнгийн хүрээнд явуулж буй зөвлөгөөн, арга хэмжээнд мөн дээрх чиглэлүүдээр судлаачид, шинэ санаачилга гаргагчид, инновацийн бодлого, стратеги хөгжлийн тулгамдсан асуудлуудын тухай, зах зээлд нэвтрүүлэх боломжтой шинэ санаачилгуудын талаар төрийн болон төрийн бус байгууллага, бизнес эрхлэгчдийн төлөөллүүд илтгэл тавьж байгаа.

     Үзэсгэлэн өнөөдөр, маргааш хоёр өдрийн турш МҮХАҮТ-ын үзэсгэлэнгийн танхимд үргэлжилнэ.