Мишээл барилгын их дэлгүүрт төвлөрсөн Төрийн үйлчилгээний нэгдсэн төвийн зэрэгцээ үйл ажиллагаагаа эхлүүлээд удаагүй байгаа нэгэн чухал газар бол “Орон Сууцны Бирж” юм. Энэхүү бирж нь Улаанбаатар хотод хэрэгжиж буй бүхий л орон сууцны  төсөл хэрэгжүүлэгч, борлуулагч компаниудтай хамтран ажиллаж, тэдгээрийн мэдээллийг нэг дор төвлөрүүлж буйгаараа ихээхэн ач холбогдолтой.

     Мишээл барилгын их дэлгүүрт барилгын бүх төрлийн материалын худалдаа явагдахаас гадна энэ салбартай холбоотой Төрийн бүх төрлийн үйлчилгээ, лавлагааны төв байршиж, НОСК, ТОСК болон банк санхүүгийн байгууллагын мэдээллийн төв ажиллаж буй нь иргэдэд тулгардаг хүнд суртал, хүндрэлийг шийдсэнээс гадна “Орон Сууцны Бирж” нь барилга, орон сууцны зах зээлд томоохон хувь нэмэр оруулах давуу талыг бүрдүүлж байна.



     Хан-Уул дүүргийн хоёрдугаар хороонд байрлах Мишээл барилгын их дэлгүүр дэх Төрийн мэдээллийн нэгдсэн үйлчилгээний нээлтийн ёслолд оролцсон Нийслэлийн засаг дарга бөгөөд Улаанбаатар хотын захирагч Э.Бат-Үүл, Хот байгуулалт, хөрөнгө оруулалтын асуудал эрхэлсэн орлогч С.Очирбат, Монголын банкны холбооны гүйцэтгэх захирал Ж.Үнэнбат болон Төрийн байгууллагуудын төлөөлөл, удирдах ажилтнууд “Орон Сууцны Бирж”-ийн үйл ажиллагаатай танилцсан юм.



     Зах зээлийнхээ эрэлт хэрэгцээг мэдэрч, үр дүн ач холбогдол өндөртэй шинэлэг санаачилга гарган, аж хэрэг болгож байгаад сэтгэл өндөр байгаагаа хотын дарга мэдэгдээд, биржийн “360 VR” шоурүүмд төслийн танилцуулгын шинэ хувилбарыг сонирхон танилцлаа.

     “Орон Сууцны Бирж” нь цаашид орон сууцны төсөл хэрэгжүүлэгч, борлуулагч аж ахуйн нэгжүүдтэй хамтран ажиллаж, тэдний бүтээгдэхүүн үйлчилгээг олон нийтэд хүргэх, сурталчлах, мэдээлэл байршуулах боломж нээлттэй гэдгийг дашрамд дуулгая.