Банкууд 2016 оны 5 дугаар сард нийт 1654 зээлдэгчид 102.0 тэрбум төгрөгийн ипотекийн зээл шинээр олгосноор ипотекийн зээлийн үлдэгдэл 3704.2 тэрбум төгрөг, нийт зээлдэгчдийн тоо 83280-д хүрчээ. Тайлант сард 5%-ийн хүүтэй 21.1 тэрбум төгрөгийн зээлийг 439 зээлдэгчдэд олгосон бол 8%-5% руу 9.2 тэрбум төгрөгийн, банкуудын өөрийн эх үүсвэрээс 5%-руу 2.1 тэрбум төгрөгийн зээлийг тус тус шилжүүлжээ. 

     Тайлант сарын эцэст ипотекийн зээлийн үлдэгдлийн жилийн өсөлтийн хурд өмнөх сартай харьцуулахад 0.6 нэгж хувиар өссөн бол өмнөх оны мөн үеэс 13.8 нэгж хувиар буурч 18.4 хувьд хүрсэн байна. 


 
     Тайлант сарын эцэст ипотекийн зээлийн үлдэгдлийн 76.5 хувь буюу 2832.3 тэрбум төгрөгийг “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээл (жилийн 5 болон 8 хувийн хүүтэй зээл, 5 болон 8 хувийн хүүтэй зээлд шилжүүлсэн зээл), 21.9 хувь буюу 809.8 тэрбум төгрөгийг банкуудын өөрийн эх үүсвэрээр олгосон зээл, 1.7 хувь буюу 62.1 тэрбум төгрөгийг бусад эх үүсвэрээр олгосон зээл бүрдүүлж байна.




     2016 оны 5 дугаар сарын байдлаар ипотекийн зээлийн үлдэгдлийн 99.0 хувь нь төгрөгийн зээл, 1.0 хувь нь валютын зээл байна. Ипотекийн зээлийн үлдэгдэлд эзлэх хугацаа хэтэрсэн зээлийн хувь 2016 оны 5 дугаар сарын байдлаар 2.8 хувь, чанаргүй зээлийн эзлэх хувь 1.1 байна.



Тайлант сард олгосон зээл

     Тухайн сард олгосон ипотекийн зээл өмнөх сараас 13.5 хувиар, өмнөх оны мөн үеэс 23.6 хувиар тус тус өсч 102.0 тэрбум төгрөгт хүрчээ.



Тайлант сард шинээр олгосон зээлийн 89.1 хувь буюу 90.9 тэрбум төгрөг нь “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”ийн зээл, 10.9 хувь буюу 11.1 тэрбум төгрөг нь банкуудын өөрийн эх үүсвэрээс олгосон зээл  байна.



Нэг зээлдэгчид ногдох олгосон зээлийн хэмжээ 2016 оны 5 дугаар сарын байдлаар 61.5 сая төгрөг байна. Тухайн сард 30.4 тэрбум төгрөгийн ипотекийн зээл төлөгдсөн нь өмнөх оны мөн үеэс 14.1 хувиар буурчээ. 



Зээлдэгчдийн тоо

     Тайлант сард нийт 1654 зээлдэгч шинээр ипотекийн зээлд хамрагдсанаас 1409 зээлдэгч “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээлд, 245 зээлдэгч банкны өөрийн эх үүсвэрийн зээлд хамрагдсан байна. 



     2016 оны 5 дугаар сарын байдлаар нийт 83280 иргэн ипотекийн зээлтэй байгаагаас 60455 нь “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр”-ийн зээлд (үүнээс 1154 нь 5 хувийн хүүтэй зээлд, 850 нь 8 хувиас 5 хувь руу шилжсэн зээлд хамрагджээ), 20942 нь банкуудын өөрийн эх үүсвэрийн зээлд, 1883 нь бусад эх үүсвэрийн зээлд хамрагдсан байна.



Зээлийн хугацаа

     Тайлант сард банкууд 2.4 сараас 30 жилийн хугацаатай зээл олгосон бөгөөд жигнэсэн дундаж хугацаа нь 19.7 жил байна. Ипотекийн зээлийн үлдэгдлийн жигнэсэн дундаж хугацаа 2016 оны 5 дугаар сарын байдлаар 16.2 жил байна.

     Тухайн сард олгосон зээлийн дийлэнх буюу 47.3 хувь нь 16-20 жилийн хугацаатайгаар олгогдсон байна. Харин нийт ипотекийн зээлийн үлдэгдлийн 71.9 хувь нь 16-20 жил, 17.0 хувь нь 11-15 жил, 9.1 хувь нь 6-10 жил, 1.1 хувь нь 1-5 жилийн хугацаатай байна. 



Зээлийн хүү

     Банкуудын 2016 оны 5 дугаар сард олгосон ипотекийн зээлийн жигнэсэн дундаж хүү 8.3 хувь болжээ. “Орон сууцны ипотекийн санхүүжилтийн тогтвортой тогтолцоог бүрдүүлэх хөтөлбөр” хэрэгжиж эхлэхээс өмнөх үетэй харьцуулахад жигнэсэн дундаж  хүү 8.3 нэгж хувиар буурсан байна. 

     Банкуудын өөрийн эх үүсвэрээр олгосон зээлийн жигнэсэн дундаж хүү 16.3 хувь байв. Ипотекийн зээлийн жигнэсэн дундаж хүү 6.7-10.4 хувийн хооронд байлаа.