Амины орон сууц барихтай холбоотой товч зөвлөгөөг энэ чиглэлийн мэргэшсэн компанийн төлөөллүүдээс авлаа.

“Хонгран Сфеко” ХХК-ийн Борлуулалтын албаны дарга Э.Энхбат


Амины орон сууцыг боломжийн өртгөөр чанартай барихад ямар материал ашиглах вэ? Угсралт дээр юун дээр анхаарвал зохимжтой вэ? Онцлоход дулаан алдагдал болон дулаалгын талаар?

Амины орон сууцыг чанартай материалаар барихад үнэ өсөх гол шалтгаан нь импотын материалын тухайд тээвэрлэлт болон гаалийн татвар байдаг. Дотооддоо үйлдвэрлэж байгаа бүтээгдэхүүнд ийм нэмэгдэл байхгүй. Харин чанарыг нь маш сайн судлах шаардлагатай. Мөн хөөсөн блок, шохойн блок гэх мэт эрүүл ахуйн шаардлага хангаагүй бүтээгдэхүүнээс татгалзах хэрэгтэй. Хэрэв Монгол дахь модыг ашигласан Канад технологиор боловсруулах үйлдвэр байгуулагдвал амины орон сууц хямд өртөгөөр, хамгийн гол нь чанартай сууц босох боломжтой.
Амины орон сууц /АОС/ барихад цэвэр, бохир ус, халаалт, дулаалга гэх мэт зүйлс хамгийн хүндрэлтэй. АОС нь нэг айлын хэрэглээ учир цэвэр, бохир ус дотогш нэвтрэх болон гарах хэсэгт хөлдөх эрсдэл өндөр байдаг. Одоогоор манай улсад хэрэглэж байгаа аргууд болох дулаалга, халаадаг утас гэх мэт зүйлс нь найдвартай шийдэл биш. Тиймээс барилгаа суурьнаас нь эхлэн зөв төлөвлөх шаардлагатай. Үүнээс гадна эрүүл ахуйн шаардлага хангаагүй зориулалтын бус бүтээгдэхүүн хэрэглэхгүй байхыг анхаарах хэрэгтэй. Өнөөдрийн бүтээгдэхүүн маргаашийн маркетинг болж байдаг шүү дээ.
Суурийг газар зүйн болон барилгын хийцийн онцлогт тохируулан ашиглах материал, даацыг тооцоолно. Манай иргэд болон зарим барилгын компаниуд ч инженер, геологийн судалгааг анхаарч сайн хийдэггүйгээс суурийг буруу цутгах тохиолдол гардаг. 



Дулаалгын материалийн хувьд байгууллагууд зардалаа хэмнэх үүднээс дулаалгын материалын чанар муутайг сонгох, эсвэл материалаа хэмнэж бага хийдгээс үүдэн амины орон сууцны дулаан алдагдал их болдог. Үр дүнд нь  амины орон сууцны хэрэглээний зардал улам өснө. Монголд “Пассив барилга”-ын тухай хэд хэдэн ном гарсан бий ч барилгын компаниуд мэддэггүй нь харамсалтай. Мөн амины орон сууцны зах зээл хөгжихгүй байгаа гол шалтгаан бол халаалт, дулааны төлөвлөлтүүд байгаа юм. Барилга барихдаа олдоц ихтэй, өртөг бага, хэрэглээний зардал өндөртэй халаалт дулааны системүүдийг ашиглаж байгаа нь эргээд амины орон сууцны зах зээлийг хөгжих боломжгүй болгож байна. Жишээ нь, 250 м/2 талбайтай амины орон сууц шалны халаалт ашиглахад ойролцоогоор сард 1 сая орчим төгрөгийн цахилгаан зарцуулна. Энэ нь тухайн сууцыг зах зээл дээр ашиглах боломжгүй болгож байгаа юм. Дулаан алдагдлыг хамгийн багаар байлгасан ч, энэ нь хэрэглээний зардлыг 20 хувиас илүү бууруулах боломжгүй.

http://hongrunsfeco.barilga.mn/

       Барилга угсралт, үйлдвэрлэлийн “Амето” ХХК-ийн Зөвлөх инженер, Монгол Улсын гавъяат барилгачин М.Норов

 
Хөнгөвчилсөн ган араг бүтээцэд амины орон сууцыг хэрхэн барих тухай зөвлөгөө өгнө үү.

Сүүлийн жилүүдэд хөнгөвчилсөн ган арагт (цувимал хэлбэржүүлсэн ган) хийцийг гурван давхар хүртэлх орон сууц, хаус, олон нийтийн үйлчилгээний зориулалттай барилга болон хуучин барилгуудад давхар нэмж барих замаар түлхүү ашиглаж байна. Энэхүү хөнгөвчилсөн арагт ган нь.

 
Хийцлэлийн хувьд Канад модон барилгатай зарчмын хувьд төстэй. Барилгын бүх даацыг босоо тулаасууд, хэвтээ чиглэлийн татанга хэлбэрийн дам нуруунууд, хөндлөн чагтан холбоосуудаар ган каркас холбогдож 1 цул, бат бөх бүтээц болж барилгын босоо чиглэлийн ачааны болон хөндлөн чиглэл (салхины хүч, газар чичирхийлэл зэрэг)-ийн ачааны даралтыг бүрэн хүлээн авч ашиглагдаг. Үүний дараа дулаалгыг орчин үеийн дэвшилт материал буюу хөөсөнцөр хавтан, шилэн болон чулуун (базальт) хөвөн, ноосон хөвөн дулаалгаар, өнгөлгөөг модны зоргодсон (OSB) хавтан, гипсэн болон цементэн хавтан, гадна өнгөлгөөний ус чийгний хамгаалалттай зориулалтын хавтангуудаар өнгөлнө.
Дулаалгын материалаас чулуун хөвөн, шилэн хөвөн зэрэг нь галд тэсвэртэй, хорхой шавьж үрждэггүй. Мөн дулаалгын материал болон өнгөлгөөний хавтанг хэрэглээний шаардлагаас хамааруулан зузааныг сонгож авах боломжтой. Тухайлбал, OSB хавтан гэхэд 0,6см-1,5см эсвэл үүнээс ч илүү зузаан байх сайн талтай.



2013-2016 онд газрын хүртээмжнээс шалтгаалан 2-4 давхар буюу цөөн давхарт барилгаа давхарлуулах хүсэлт ихээр гарч байна. Энэ нь өртөг зардлыг буруулахаас гадна, нэмэлт давхарын барилга угсралтын ажил явагдаж байхад доод давхруудын ажиллагаа хэвийн байдагт бас нэг ач холбогдол нь оршиж байгаа юм. Хуучин барилгыг давхарлахад төмөр каркасыг бетон суурин дээр нь төмөр бүс бетонд боолтоор боож бэхлэж өгдөг.
Одоогийн ханшаар ган каркасан барилгын иж бүрэн угсралт, дотор сантехник, цахилгаан, холбоо дохиоллын ажлуудын 1м²-ийн өөрийн өртөг  нь 580,000-760,000  төгрөгт багтаж байна. (компанийн ашиг болон суурь, газар шорооны ажил орохгүйгээр)



Захиалагчдад анхааруулж хэлэхэд энэхүү төрлийн барилга угсралтын ажлыг хийлгэхдээ мэргэжлийн туршлагатай байгууллагатай хамтран ажиллах нь танд хөрөнгө мөнгөө хэмнэх, цаг хугацаа хожих боломж олгоно гэдгийг санахад илүүдэхгүй. Учир нь төмөр карказыг дурын хүн угсарч болох мэт харагддаг тул мэргэжлийн бус хүмүүс энэ ажил руу хэт хошууран орж, алдаа гаргадаг учир хэрэглэгчдийг хохироох явдал түгээмэл тохиолдож байна.