Барилгын дээвэр гэхээр л бараан өнгөтэй, онгож гандсан, тоос шороонд дарагдсан, ус тогтож гоожсон, ашиглагддаггүй хоосон талбай байдаг гэсэн ойлголт байдаг. 

     Тиймээс барилгын дээврийн талаарх шинэлэг санаа болон хэрэгтэй бусад зөвлөмжийг уншигчиддаа хүргэе. Олон Улсад инженерүүдийн гол гарын авлага болсон Basic Civil Engineering номонд барилгын дээвэр нь дараах үндсэн үүргүүдтэй гэж дурджээ.

     Эдгээр гол таван үзүүлэлтийн талаар хувиараа байшин барьж байгаа болон томоохон барилгын төсөл дээр ажиллаж буй инженерүүд сайтар мэддэг байх нь зүйтэй.

1. Барилгын хийцлэл сайтай, ачаалал авах чадвартай, хавтгай барилгын дээврийг хүүхдийн тоглоомын талбай, задгай лоунж, цэцэг ногоо тарих, усан бассейн зэргээр ашиглаж болдог. 



2. 2015 онд орон сууц ашиглалттай холбоотойгоор МХЕГ-т ирсэн иргэдийн санал гомдлын 78 хувь нь дээвэртэй холбоотой гэсэн мэдээлэл байна. Манай орны хувьд 7-9 сарын үед дээврийн ус тусгаарлалтын материал илүүтэйгээр гэмтэл авдаг. Гэхдээ энэ нь борооноос болсон гэвэл та эндүүрч байна. Ер нь ус тусгаарлалтын материалыг нарны хэт ягаан туяа маш ихээр гэмтээдэг.

     Барилга гэдэг яг хүний биетэй адил хөдөлдөг, амьсгалдаг. Тэгвэл дээвэр бол зулайн хэсэгтэй яг адил маш эмзэг, байнгын анхаарал арчилгаа шаарддаг хэсэг юм. Бараан өнгийн дээвэртэй байх нь халуун наранд хар даавуу толгой дээрээ тавиад явж байгаа хүнтэй адил билээ. Хэрвээ таны байшингийн дээвэр хар цаасан ( SBS bitumen) материалаар хийгдсэн байвал зуны нартай өдөр гадаа 34°C байхад хар цаасан дээврийн гадаргуу дээр 72-78°C халуун төөнөж байдаг. Энэ хэт халалт нь дээврийн материалд муугаар нөлөөлдөг. 



3. Дулаан агаарын хөдөлгөөн дээшээ, хүйтэн агаар доошоо чиглэлд байдаг. Тиймээс дээврийн дулаалгыг сайн хийх хэрэгтэй. Сүүлийн үед барилгын дээврийн гүйцэтгэлд гарч байгаа нийтлэг нэг алдаа байна. Дээврийн үндсэн дулаалгын материалыг налуу гаргаж байна гээд зарим хэсэгт багасгаж хийгээд барилгын дулаан алдагдлыг нэмэгдүүлэх болсон.

- Дээврийн дулаалгын үндсэн материал нь жигд нэг түвшинд байх ёстой.
- EPS хөөсөнцрийг 20 см зузаантай тавих бол 10 см-ээр 2 хэсэг болгон зүсээд амыг нь даруулж тавих нь илүү үр дүнтэй.
- Дээврийн ачааллаас хамааран дулаалгын материалын сонголтыг хийдэг. 



4. Дагалдах хэрэгслүүд зөвшөөрөгдсөн байх ёстой гэдэг нь дээврийн ус тусгаарлалтын материал болон хийцлэлтэй харьцаж байгаа анкор, эрэг шураг, ус зайлуулах хоолой, агааржуулагч, аянга зайлуулагч, тоног төхөөрөмжийн хөл зэрэг хоорондоо нягт уялдаатай, нэг биет болох шинж чанарыг агуулсан байх ёстой. Олон барилгад үүнтэй адил алдаа гардаг. Ус зайлуулах хоолой нь үндсэн материалтайгаа нэг биет болоогүйгээс хоолойгоо дагасан ус алдалт, зориулалтын хоолой хийгээгүйгээс битүүрэх зэрэг дутагдал элбэг тохиолддог. 10 жилийн туршид дээврээ таван удаа засуулаад ч ус нь гоожсоор байгаа газар бий. Тиймээс засвар хийхээсээ өмнө оношийг зөв тогтоох хэрэгтэй. 



     Барилгын дээвэр нь галыг эсэргүүцдэг, дэмждэггүй зэрэг үзүүлэлттэй байх ёстой. Зэргэлдээх барилгад гал гарахад дээврээр дамжин гал орж ирэх магадлал 80-85% (Basic Civil Engineering) байдаг. Тиймээс дээврийн ерөнхий бүтэц галаас сайтар хамгаалагдахаас гадна дээд хэсэгт ил байрлах ус тусгаарлалтын материал нь галыг дэмждэггүй байх ёстой. 

     Монголын зах зээлд ус тусгаарлалтын шийдэл, материал, ажлын гүйцэтгэл сүүлийн гурван жилийн хугацаанд улам сайжирсаар байгаа. Иймд та өөрийн хүссэн загвараар байшин, барилга бариулж, дээврийн талбайгаа ашиглан аюулгүй байдлыг сахиж хэрэгжүүлнэ гэдэгт найдаж байна.