Баянгол дүүргийн 3-р хороонд байрлах 53-р байрны оршин суугчид урд шөнө нойргүй хоножээ. Учир нь шөнийн турш үргэлжлэн орсон борооны улмаас дээврийн ус байшингийн нэг давхар хүртэл нэвт гоожсон байна. Шөнийн 11 цагаас гоожсон усыг шавхаж эхэлсэн оршин суугчид хүч хүрэлгүй, ах дүүсээ дуудан тусламж хүсэхэд хүрчээ.

     Тэд шөнө нь СӨХ-ны даргад мэдэгдэхийг хүссэн ч утсаа аваагүй учраас өглөөний найман цагт холбогдох байгууллагад нь мэдэгдсэн ч дээврийн ус алдалтыг хариуцдаггүй хэмээн үл тоосон аж. 

     Байрны дээврийн засварын ажлыг гүйцэтгэсэн "Эсти" ХХК агааржуулагч хоолой байршуулах ажлыг гүйцэтгэхдээ дээврийг цөмлөснөөс ийнхүү ус алдахад хүрсэн гэж оршин суугчид нь тайлбарлаж байгаа юм. Хариуцлага алдсан компаниас болж хохирол амссан айлуудын хохирлыг хэн хэрхэн барагдуулах нь одоогоор тодорхойгүй байна.