Өнөөдөр цахилгааны төлбөрөөс нэг тэрбум төгрөг завшиж, хэрэглэгчдийг хохироосон талаар “Хэрэглэгчдийн эрх ашгийг хамгаалах нийгэмлэгүүдийн нэгдсэн холбоо”-ноос мэдээлэл хийв.

Тус холбоонд өнгөрсөн 2014 онд “Орон сууцанд амьдардаг иргэдээс ЦЭХ-ний үнийг ахуйн хэрэглэгчийн тарифаар бус үйлдвэр, аж ахуй нэгжийн үнийн тарифаар авч байна” гэсэн гомдлын дагуу хяналт шалгалт хийжээ. Шалгалтаар “Жигүүр гранд”, “Bluesky“, “АО жаргалан” зэрэг нийт 174 аж ахуй нэгж 17500 өрхийг хохироосон байна. Аж ахуй нэгж байгууллагийн эрчим хүчний үнэ к/ц нь 128.5 төгрөг, ахуйн хэрэглэгчийнх 498.4 төгрөг аж. Ийнхүү үнийн зөрүүг судлахад нэг өрх жилд 54180 төгрөгөөр, нийт хохирсон өрхийн дүнгээр 948 сая 150 мянган төгрөгийг шамшигдуулжээ. 

Дээрх нэр бүхий барилгын компанууд барилга бүрэн ашиглалтад орохоос өмнө ЦЭХ-ний тусгай зөвшөөрөл авалгүйгээр орон сууц худалдаалсан аж. Тиймээс өмнө бүртгэгдсэн компанийн хувиар эрчим хүчний төлбөр төлөгдөх болжээ. Оршин суугчид гомдол гаргасан тохиолдолд цахилгааныг тасалж хүндрэл учруулдаг гэнэ. 

Хэрэглэгчдээс ирсэн гомдлын дагуу “Хэрэглэгчдийн эрх ашгийг хамгаалах нийгэмлэгүүдийн нэгдсэн холбоо” нь “Эрчим хүчний зохицуулах хороо” мөн “УИХ-ын өргөдөлийн байнгын хороо"-нд албан ёсны гомдол гаргасан боловч хүлээж аваагүй аж.