Монгол Улсад шинэ цагийн барилгын салбар үүсч хөгжсөний 90 жилийн ойг угтаж “Өндөр бүтээл урлаг спорт”-ын аяныг Төрийн орон сууцны корпораци нийслэл хотын хэмжээнд эхлүүлж байна. Өнгөрсөн сард тохиосон салбарын 89 жилийн ойн баярын арга хэмжээний үеэр эхлүүлсэн барилга, урлаг, спортын салбарынхныг хамрах аяны хүрээнд шилжин аялах тугийг тус корпорацид гардуулсныг өнөөдөр ийнхүү мандуулж байгаа юм.

     Туг мандуулах ёслолын ажиллагаанд Барилга, хот байгуулалтын яамны Төрийн нарийн бичгийн дарга С.Магнайсүрэн, Нийслэлийн Засаг даргын орлогч С.Очирбат, Барилгын Хөгжлийн төвийн захирал Б.Баярсайхан, Монголын Барилгачдын холбооны ерөнхийлөгч М.Батбаатар болон албаны бусад хүмүүс, мөн барилгын компанийн төлөөллүүд, инженер техникийн ажилтнууд оролцлоо. Өндөр бүтээл урлаг спорт”-ын аяны тугийг ТОСК-ийн тэргүүн дэд захирал Д.Гантулга, МУГЖ, дуучин Л.Болдбаатар, Улсын арслан П.Бүрэнтөгс, Олон улсын хэмжээний мастер, чөлөөт бөхийн ДАШТ-ний мөнгөн медальт Б.Номин нар өргөн мандуулсан юм.

     Ёслолын арга хэмжээг хэлсэн үгэндээ ТОСК-ийн тэргүүн дэд захирал Д.Гантулга, “Монгол Улсад барилгын салбар үүсч хөгжсөний түүхт 90 жилийн ой ирэх онд тохионо. Ойн хүрээнд шилжин явах тугийг бид хүлээн авч, аяныг эхлүүлж, тугийг мандуулах хүндтэй үүргийг биелүүлж байна. Барилга, урлаг спортын салбарынхан нэгдэн туг мандуулах гэж байгаадаа баяртай байна. Нэг жилийн турш шилжин аялах энэ туг олон ололт амжилтыг дагуулна гэдэгт итгэж байна. Энэхүү туг манай байгууллагад нэг сарын хугацаанд байрлана. Энэ хугацаанд бид 14 ажлыг хийж гүйцэтгэхээр төлөвлөлөө” гэсэн юм.