Төрийн орон сууцны корпорацийн хэрэгжүүлсэн “Буянт-Ухаа 1” хорооллын 701, 702 буюу D блокийн барилгатай тулган, 12 давхар орон сууцны барилгын ажлыг эхлүүлснийг оршин суугчид нь эсэргүүцэж, хэвлэл мэдээллийнхэнд хандлаа. Оршин суугчид нэгдэн түр хороо байгуулж, тус барилгын гүйцэтгэгч компанийн ажилтнуудтай уулзаж, Нийслэлийн засаг дарга бөгөөд Улаанбаатар хотын захирагч Э.Бат-Үүл, Хан-Уул дүүргийн ЗДТГ, Төрийн орон сууцны корпораци зэрэг байгууллагуудад асуудлыг шийдвэрлэж өгөхийг хүссэн албан бичгийг хүргүүлсэн байна. Тус барилгын ажлыг “Нутгийн зам” ХХК гүйцэтгэж байгаа ч, тэднээс захиалагч компанийн талаар тодруулахад хэвлэлийнхэн болон оршин суугчдад мэдээлэл өгөхөөс татгалзаж, “мэдэхгүй” гэсэн хариултыг өгсөн юм.

     Зөвшөөрөлтэй эсэх нь ч үл мэдэгдэх тус барилгын гүйцэтгэгч компанитай иргэд уулзахдаа Хан-Уул дүүргийн болон хорооны холбогдох албан тушаалтнуудыг дуудсан боловч нэг ч хүн ирсэнгүй. Харин хүрэлцэн ирсэн оршин суугчдаас тодруулга авлаа.

СӨХ-ны Удирдах зөвлөлийн дарга Д.Санжжав: 701, 702, 703 гэсэн 3 байрны, ялангуяа наашаа харсан цонхтой оршин суугчдын эрх ашиг зөрчигдөж байна. Одоогийн байдлаар л гэхэд сул шороо ихтэй байгаагаас айлууд хаалга, цонх, тагт нээх боломжгүй байгаа. Энд нялх хүүхэд, өндөр настантай айлууд цөөнгүй бий. Цаашлаад дуу чимээ их гээд иргэдийн тайван амгалан орчинд, эрүүл аюулгүй амьдрах Үндсэн хуулиар олгогдсон эрх зөрчигдөж байна. Энд 12 давхар барилга барьснаар энэ байрны айлууд нар үзэхгүй, байнгын сүүдэрт амьдрах нөхцөл бий боллоо. Үүнээс болж үндсэн хөрөнгө нь үнэгүйдэх болчихоод байна. Тиймээс оршин суугчид үндсэн хөрөнгөө үнэгүйдүүлэхгүй, үндсэн хуулиар олгогдсон эрхээ эдлэхийн тулд нэгдэж, холбогдох байгууллагуудад нь мэдэгдэл хүргүүллээ.

Барилгыг гүйцэтгэгчид баярын болоод амралтын өдрүүдийг тааруулж байгаад хулгайн аргаар ажлаа хийдэг байдал хэвийн үзэгдэл боллоо. Хүмүүсийн анхаарал сарнисан баярын үеэр сууриа ухдаг, газар шорооны ажлаа амжуулаад авдаг байдал хэвшиж байна. Энд гүйцэтгэгч компани гэхээсээ илүүтэй захиалагчийг нь буруутгамаар байна. Улсын начин Б.Буядаа гэж хүний мэдлийнх гэсэн таамаг төдий яриа бий. Ер нь 9-өөс дээш давхрын барилгын зөвшөөрлийг БХБЯ-наас өгдөг гэж дуулсан. Гэсэн ч оршин суугчид байрны нар, салхийг хаасан энэ хууль бус барилгыг эсэргүүцэж, ийнхүү түр хороо байгуулан нэгдлээ.

Оршин суугч Ш.Чинбат: 701, 702 буюу хамгийн зүүн талын нар руу харсан D блокийн барилгатай тулган, 12 давхар барилгын суурийг ухаад байна. Ингэснээр тус байрны оршин суугчид нар салхи үзэхгүй, олон жилийн зээлд хамрагдан байж худалдан авсан байрны үнэ цэнийг унагаж, хүний аюулгүй орчинд амьдрах эрхийг зөрчсөн нөхцөл байдал бий болоод байна. Тиймээс бид нэгдэн Түр хороо байгуулж, оршин суугчдын гарын үсгийг цуглуулж, Нийслэлийн засаг дарга бөгөөд Улаанбаатар хотын захирагч Э.Бат-Үүл, Хан-Уул дүүргийн ЗДТГ, Төрийн орон сууцны корпораци болон бусад холбогдох газруудад нь албан бичиг хүргүүллээ.

“Нутгийн зам” гэх компани барилгын ажлыг гүйцэтгэж байгаа гэсэн мэдээлэл байна. Өдрийн цагаар ихэнх иргэдийг ажилдаа явсан хойгуур газар шорооны ажлыг эхлүүлсэн байсан. 7 хоног орчмын өмнөөс эхэлсэн. Одоогоор зөвшөөрөлтэй үгүй нь мэдэгдэхгүй, оршин суугчдад ямар нэгэн мэдээлэл өгсөн зүйл алга. Хүсэлт гаргасан байгууллагууд хариу өгөх байх, үүний хажуугаар оршин суугчид хэвлэлийнхэнд мэдэгдэхийг хүссэн. 4 давхар барилгыг 20 метрийн зайд барих ёстой гэсэн стандарт байдаг юм билээ. Гэтэл энэ 12 давхар барилга хичнээн метр зай барих ёстой вэ гэдэг нь асуудал. Өглөөний нар үздэг, зүүн тийш харсан цонхтой айлуудад маш их хүндрэлтэй болж байна.

Оршин суугч Ч.Чимэдсувд: Энэ барилга шатахуун түгээх станцтай хэт ойр байрлаж байгаа, бас манай байрнуудын нар, салхийг хаах гэж байгаад иргэд их бухимдалтай байна. Наад зах нь дуу, чимээ, шороо тоос гээд оршин суугчдад маш хүндрэлтэй байна. Бид нарт мэдэгдэх зүйл алга. Хаанаас ямар зөвшөөрөл олгосон, ямар компани захиалан бариулж байгаа нь тодорхойгүй. Манай байрнаас 10 метр хүрэхтэй үгүйтэй зай л байна. Холбогдох байгууллагуудад нь мөн хэвлэл мэдээллийн хэрэгслээр дамжуулан анхааралдаа авч, шийдвэрлэж өгөхийг хүсье.