Барилгын салбарынхны хувьд хүлээлт үүсгээд буй 9 бүлэг 53 зүйл бүхий Барилгын тухай хуулийн шинэчилсэн найруулгын төслийг хэлэлцэх эсэхийг Эдийн засгийн байнгын хорооны хуралдаанаар шийдвэрлэлээ. Тиймээс тус хуулийн төсөлд тусгагдсан гол заалтууд болон өөрчлөлтүүдийн талаар Барилга, хот байгуулалтын сайд З.Баянсэлэнгээс тодруулсан юм.

     Уг хуулийн төслийг эрчим хүч, авто зам, зэрэг холбогдох бүхий л салбартай нь уялдаатай боловсруулсан гэдгийг сайд мэдэгдлээ. Мөн барилгын салбарын ажиллах хүчнийг амь насны даатгалд хамруулах, барилгын компаниуд ажилтнуудыг бүртгэлжүүлж, мэдээллийг ил тод байлгах, ашиглалтын гэрчилгээг чанар, аюулгүй байдлын түвшингээр нь ялгах, төрийн зарим чиг үүргийг төрийн бус байгууллагаар гүйцэтгүүлэх зэрэг зохицуулалтуудыг тусгасан аж.

     Төрийн зарим чиг үүргийг ТББ-аар гүйцэтгүүлэх талаар тодруулахад, төрийн үйлчилгээний хүртээмж чанарыг дээшлүүлэх, хүнд суртлыг багасгах үүднээс барилгын ажилтныг давтан сургах, мэргэжлийн зэрэг олгох, барилгын тусгай зөвшөөрөл олгох зэрэг хэд хэдэн үүргийг мэргэжлийн холбоодод нь даалгах зохицуулалтуудыг хуулийн шинэчилсэн найруулгын төсөлд багтаасан гэдгийг тэрээр мэдэгдсэн юм. Тухайлбал, барилгын тусгай зөвшөөрөл олгох эрхийг ТББ-уудад шилжүүлснээр 28 хоногт олгогддог байсан зөвшөөрөл 10 хоногт гарах боломжтой юм байна.

     Харин газар хөдлөлтийн үед барилга нурснаас үүдэх хариуцлагыг ямар байгууллага хүлээх тухай шинэчилсэн найруулгын төсөлд тусгагдаагүй аж.