Мэдээллийн технологи, бүтээн байгуулалтын салбарт хүч түрэн орж буй Москва хотод дэлхийд алдартай архитектор Заха Хадидын бүтээл анх удаа сүндэрлэж байна. Хар, цагаан өнгийг хослуулсан өвөрмөц хийц дизайны шийдлийг шингээсэн шат, тавцан бүхий тус барилга нь 7 давхар аж. Москвагийн зүүн өмнөд хэсэгт Дубровка метроны буудлын орчимд Заха Хадидын архитектурын багийн гүйцэтгэсэн энэхүү Доминион оффис барилгад бизнесийн гараагаа эхлүүлж буй шинэ компаниуд байрлах аж.

     Шарикоподшипниковская гудамжинд байрлах цагаан тавцан бүхий тус барилга нь энгийн бус, этгээд төрх байдлаараа яах аргагүй бусдаас ялгарч, олны анхаарлыг татаж байгаа. Шалны хавтангийн хэсэг болон шалыг бүрсэн шил хооронд фасадны нэгэн адил шийдэлтэй аалзны тор мэт хээг бий болгожээ.

     Барилгын төв хэсэгт цагаан хашлагатай гялалзсан хар гишгүүр бүхий шат хөндлөн байрлана. Давхар бүрт байх тахир тагтнууд нь Хадидийн MAXXI музейн шатны хэлбэртэй төстэй харагдах аж. Давхар тус бүрийг тахиралдсан байдлаар холбож өгсөн нь барилгын бүхий л давхар, хэсэг бүрт байгалийн гэрэл хангалттай тусах боломжийг олгоно.

     Газар дор автомашины хоёр давхар зогсоолтой 7 давхар уг барилгад зоогийн газар, хурлын танхимууд байрлах аж. Энэ нь 62 метрийн өндөртэй бөгөөд оффисийн зориулалтаар нийт 21,184 ам метр талбайг төлөвлөжээ. Түүнчлэн дээд давхруудад шилэн фасад хийхээс татгалзаж, үйлчилгээний хэсгүүдэд бүхэлд нь галын гарц төлөвлөн, цахилгаан шат болон ариун цэврийн өрөөнүүдийг барилгын төв хэсгээс зайдуу байрлуулсан байна.

     Тагттай хэсгүүдэд уулзалтын өрөөнүүдийг байршуулж, өрөө тасалгааны хаалгуудыг шилээр хийсэн нь нарны гэрлийг тусгахад дөхөмтэй ажээ. Мөн уулзалтын танхим, зоогийн газруудыг доод давхарт төлөвлөн, гарааны бизнесээ эхлүүлж буй шинэ компаниудад оффисоо хуваан эзэмших нийтийн талбай зэргийг бий болгосноороо онцлогтой юм.