Цэвэр усны хомсдолд ороход тун ойрхон байгаа энэ үед бетон зуурмагийн үйлдвэрүүд усыг дахин ашиглах технологи нэвтрүүлж эхэлснээр ус хэмнэлтэд багагүй хувь нэмрээ оруулахнээ. Энэ чиглэлээр үйл ажиллагаа явуулдаг нэг үйлдвэр жилд дунджаар 3000-25000 шоо метр ус ашиглаж, зуурмаг үйлдвэрлэдэг. Харин холбогдох байгууллагуудын тавьсан шаардлагын дагуу “Премиум Конкрит”, “Ремикон”, “Самвон Дрим Вок” зэрэг компаниуд үйлдвэртээ зуурмаг тээвэрлэгч автомиксерийн торх цэвэрлэж буй усыг тунгаан, дахин ашиглах эргэлтийн усан сан байгуулсан байна. Эргэлтийн усан сан байгуулж ашигласнаар нэг үйлдвэр жилд 300-1000 шоо метр гүний ус хэмнэх боломжтой ажээ.

     Түүнчлэн удахгүй “Мэргэн хангал”, “Эйч энд Эйч” компаниуд эргэлтийн усан сан ашиглалтад оруулахаар болжээ. Бетон зуурмаг үйлдвэрлэхдээ гүний ус ашигладаг аж ахуйн нэгжүүдийн усны хэрэглээг хянах зорилгоор өнгөрсөн оноос үйлдвэрүүд усны тоолуур тавьж эхэлсэн. Улаанбаатар хотод тогтмол үйл ажиллагаа явуулдаг бетон зуурмагийн 78 үйлдвэр байгаа бөгөөд 92 гүний худгаас усаа татдаг байна. Тус байгууллага одоогоор 63 үйлдвэрт усны тоолуур суурилуулаад байгаа.