УИХ-ын Байгаль орчин, хүнс, хөдөө аж ахуйн байнгын хорооны хуралдаанаар цэвэрлэх байгууламжийн өнөөгийн байдлын талаар холбогдох байгууллагын мэдээллийг сонсов. Гишүүд зарим зүйлийг тодруулж, санал гарган ажлын хэсэг байгуулахаар боллоо. Тус ажлын хэсгийг Л.Эрдэнэчимэг гишүүн ахална.

БХБЯ-ны Барилга, нийтийн аж ахуй бодлогын газрын дарга Р.Эрдэнэцэцэгийн мэдээлснээр нийт хүн амын 80,4 хувь нь баталгаат ундны усаар хангагдаж, 41,1 хувь нь сайжруулсан ариун цэврийн байгууламжид холбогджээ. Цаашид Улаанбаатар хотын бохир ус цэвэрлэх байгууламжийг өргөтгөн, шинэчлэх, шинээр барих төсөл, арга хэмжээг нэвтрүүлэхдээ Өрийн удирдлагын хуулийн хүрээнд зарим зохицуулалт хийхээр буй гэв.

Ус сувгийн удирдах газрын дарга С.Үнэн, 50 жилийн настай Улаанбаатар хотын төв цэвэрлэх байгууламж хоногт 170 мянган шоо метр усыг 65-70 хувь цэвэршүүлдэг. Тус байгууламж нь 500 мянган хүн ам бүхий суурин газарт ажиллах зориулалттай ч өнөөдөр олон үйлдвэр, аж ахуйн газрын химийн өндөр бохирдолтой бохир усыг цэвэршүүлж буй нь цэвэрлэгээний горимыг алдагдуулж байна.