Энэ оны турш Америкийн Sun Edison компани Британы эрчим хүчний өсөлтөд гол үүрэг гүйцэтгэгчдийн нэг байв. Эднийх айлуудын цахилгааны татаасын хуримтлалаас зохих хувь хүртэхийн тулд нарны хавтангаа үнэгүй суурилуулах хүртэл арга хэмжээ авсан. Энэ үйлчилгээнд ч иргэд олзуурхаж байв. Гэтэл наймдугаар сард Дэвид Камероны тэргүүлсэн Британийн консерватив Засгийн газар уг татаасыг 87 хувиар хасаж орхив.

Улмаар АНУ-ын Миссури мужийн Сент Луис хотод төвтэй Sun Edison компани үнэгүй суурилуулах хөтөлбөрөө зогсоох шийдвэрт хүрчээ. Тус хөтөлбөрийг гуравдугаар сард эхлүүлснээс хойш 1000 орчим айл өрхөд үйлчилсэн аж.
Одоохондоо Британд нарны эрчим хүч нийт цахилгаан үйлдвэрлэлийн дөрөвхөн хувийг эзэлдэг.

Сэргээгдэх эрчим хүчийг татаасаар тэтгэх хөтөлбөрийг хумих хүрээнд авч буй нарны эрчим хүчний татаасыг бууруулах арга хэмжээ ирэх нэгдүгээр сараас хэрэгжих ёстой. Германд мөн адил нарны эрчим хүч өргөжиж байгаа. Гэвч Засгийн газар нь урамшуулалаа аажмаар багасгаж байна.

Bernstein Research–ын шинжээч Дипа Венкатесваран, “Британи хамгийн өгөөмөр зохицуулалтаас нөгөө туйл руу нь явчихлаа” хэмээжээ. Харин Эрчим хүчний сайд Амбер Рудд, өртөг багасах тусам сэргээгдэх эрчим хүчний аж үйлдвэр татаасгүйгээр амьдрах чадвар нэмэгдэж байгаа хэмээн Засгийн газрын байр суурийг хамгааллаа.