Өчигдрийн Засгийн газрын хуралдаанаар бүх дэд сайдыг албан үүргээс нь чөлөөлжээ. Төсвийн тодотгол батлагдсантай холбоотойгоор ийнхүү дэд сайдын орон тоо алга болж байна.

     Шийдлийн Засгийн газар нь 15 яамны 17 дэд сайдтай үйл ажиллагаагаа явуулж байсан бөгөөд МАН-ыг Засгаас гарсны дараа дэд сайд нарыг нь чөлөөлсөн ч орны хүмүүсийг нь томилоогүй байсан юм. Нэг хэсэг дэд сайд нарыг томилуулахаар нэлээд яригдсан ч АН-ынхан дотроо багагүй маргаан өрнүүлж байсан удаатай. Удалгүй төсөв хэмнэх үүднээс дэд сайдгүй ажиллахаар ярьж эхэлсэн нь ийнхүү хэрэгжиж байна.

     Улс төрийн намуудын хувьд албан тушаалын хуваарилалт хийхэд чухал нөлөө үзүүлдэг гэх уг албан тушаал сүүлийн хэд хэдэн Засгийн газрын үед байсаар ирсэн юм. АН, МАХН, ИЗН-ын дэд сайдуудын чөлөөлөгдсөнийг өнөөдөр тогтоол гаргаж, албажуулах юм.