Гэр хороололд төлбөрийн чадварт нийцсэн 10 мянга гаруй өрхийг орон сууцаар хангах зорилгоор гэр хорооллын 130 га газарт дахин төлөвлөлтийг хэрэгжүүлэх төслийн эхний шатны санамж бичгийг байгууллаа. Манай улсын засгийн газар, Нийслэлийн засаг даргын тамгын газраас Азийн хөгжлийн банктай хамтран хэрэгжүүлэх “Төлбөрийн чадварт нийсэн орон сууц ба хотыг дахин шинэчлэх” төслийн хамрах хүрээ, санхүүгийн болон бүтэц зохион байгуулалт, боловсруулалт ба бэлтгэл ажил зэргийг зөвшилцөн байгуулж буй уг санамж бичигт Сангийн сайд Б.Болор, Нийслэлийн засаг дарга бөгөөд Улаанбаатар хотын засаг дарга Э.Бат-Үүл, Азийн хөгжлийн банкны Монгол дахь суурин төлөөлөгч Роберт Шоелхаммер нар гарын үсэг зурсан юм.

     Төслийн өртөг 500 орчим сая ам.доллар болно гэсэн урьдчилсан тооцоо гаргасан бөгөөд санхүүжилтийг хувийн хэвшлийн хөрөнгө оруулалтыг дэмжих хүрээнд Азийн хөгжлийн банкны зээл, олон улсын бусад байгууллагуудын тусламжтайгаар шийдвэрлэхээр төлөвлөжээ.
\
     Гэр хороололд амьдардаг иргэдэд амьдрах орчин нөхцөлөө сайжруулах, дулаан, ус хангамж болон цахилгаан сүлжээнд холбогдох зэрэг олон талын хэрэгцээ шаардлага байгаа. Харин тохирсон нөхцөл санал болгосон тохиолдолд эдгээр оршин суугчдын 75-аас дээш хувь нь орон сууц худалдан авч, нүүхэд бэлэн байгаа аж. Энэ нь өрхийн орлогын долоо дахь түвшингээс доогуур орлоготой буюу дунджаас бага орлоготой 150 мянган айлын орон сууцны эрэлт байгааг илэрхийлж байгаа юм. Харин өнөөдөр шинээр баригдаж, ашиглалтад орж буй орон сууцнуудын ихэнх нь дундаас дээгүүр орлоготой иргэдэд зориулагдсан аж.