Арилжааны банкны өндөр шалгууртай зээлэнд хамрагдахгүйгээр байр авах боломж байна. Эхний хэдэн жилдээ байрны түрээсийн хэлбэрээр төлөх аж. Тэгээд ипотекийн зээлд хамрагдах юм. Тус орон сууцны м2-ийн үнэ нь 1,100,000 төгрөг байна.

“Төлбөрийн чадварт нийцсэн орон сууц ба хотыг дахин шинэчлэх” хэмээх төслийг нийслэлийн Засаг даргын Тамгын газар, Сангийн яам, Азийн хөгжлийн банктай хамтран хэрэгжүүлэхээр болжээ. Төслийн хамрах хүрээ, санхүүгийн зохицуулалт, бэлтгэх үйл явцыг тохирсон санамж бичигт гарын үсэг зурах үйл ажиллагаа хоёр өдрийн өмнө нь болсон юм. Нийслэлийн Засаг дарга бөгөөд Улаанбаатар хотын захирагч Э.Бат-Үүл, Сангийн сайд Б.Болор, Азийн хөгжлийн банкны Монгол дахь суурин төлөөлөгч Роберт Шоелхаммер нар санамж бичигт гарын үсэг зуржээ. Урьдчилсан байдлаар төслийн нийт өртгийг 540 сая ам.доллар гэж тооцжээ. Гэр хорооллынхонд зориулсан хямд өртөгтэй орон сууцыг барихад 70-100 мянган ажлын байр шинээр нэмэгдэнэ гэсэн судалгааг ч гаргасан байна. Эдгээр байрыг хотын дэд төвүүдийг түшиглэн барих гэнэ. Нийтдээ 130 га газарт 10 мянган айлын орон сууц баригдах нь. Эхний ээлжинд Баянхошуу, Сэлбэ дэд төвүүдэд ажил нь эхэлжээ.

Төслийн ТЭЗҮ-ийн судалгаа ирэх олны есдүгээр сард дуусах аж. Засгийн газар, Азийн хөгжлийн банкны захирлуудын зөвлөл 2017 оны эхээр ТЭЗҮ-ийг баталж, төсөл албан ёсоор хэрэгжиж эхлэх юм.