BIM гэж юу вэ? BIM гэдэг нь барилгын мэдээлэлийн загварчлал буюу бодитоор баригдах барилгын цахим хэлбэр гэсэн утгатай бөгөөд олон улсад нэвтрээд  байгаа дэвшилтэт технологи ажээ. Тэгвэл Барилгын яамныхан BIM-ийг Монголд нэвтрүүлэхээр ажиллаж байна. Өнгөрсөн 7 хоногт З.Баянсэлэнгэ сайдаар ахлуулсан ажлын хэсэг Сингапур улсад ажиллаж BIM-ийн асуудлаар чуулсан олон улсын симпозиумд Монгол Улсыг төлөөлөн оролцоод ирсэн юм.

     Сингапур улс барилгын салбарынхаа бүтээмжийг 25 хувиар нэмэгдүүлэх зорилт дэвшүүлж, BIM-ийг нэвтрүүлэх үндэсний хөтөлбөрийг амжилттай хэрэгжүүлж байгаа тухай сайд сонирхуулсан юм. Тэрээр манай улс дэлхий нийтийн чиг хандлагатай хөл нийлүүлэн алхахын тулд BIM-ийг өөрийн оронд тохируулан нутагшуулах, энэ технологийг нэвтрүүлсэн улс орнуудын туршлагаас суралцах хэрэгтэй байгааг онцолсон. 

     Тэгвэл өнөөдөр “Олон улсад BIM нэвтрүүлсэн тэргүүн туршлага” сэдэвт олон  улсын семинар зохион байгуулагдлаа. Барилга хот байгуулалтын яам, Их Британийн Элчин сайдын яамны дэмжлэгтэйгээр “Билдинг Смарт Монгол” ТББ-аас санаачлан зохион байгуулж байгаа энэхүү семинарт БХБ-ын дэд сайд Г.Байгалмаа оролцсон юм. Тэрээр семинарт тавьсан илтгэлдээ “Манай улсад барилгын салбарын бүтээмжийг дээшлүүлэх, чанарыг сайжруулах, барилгын бүхий л мөчлөгийн туршид шийдвэр гаргахад шаардлагатай цогц мэдээллийн баазыг бүрдүүлэх хамгийн үр дүнтэй арга бол BIM хэмээх дэвшилтэт технологи болохыг олон улсын туршлага харуулж байна” гээд салбартаа энэхүү технологийн дэвшлийг нэвтрүүлж, мэргэшсэн боловсон хүчин бүхий хүчирхэг орчин үеийн салбар болгон хөгжүүлэхийн төлөө үйл ажиллагаа хүсэл эрмэлзлээ нэгтгэн ажиллахыг салбарын төрийн болон ТББ, хувийн хэвшлийнхэнд уриалсан юм.