Монгол хүн бүрийн сэтгэл зүрхэнд хоногшсон “Ээжээ сайн байна уу” зураг Дорнод аймгийн төвд хөшөө болон амилж, олон нийтийн хүртээл боллоо. Тус зургийг Монгол Улсын Ардын зураач, Төрийн соёрхолт Д.Амгалан зурсан юм.

Ардын зураач Д.Амгалан нь “Миний эх орны өглөө” цуврал зураасан зураг, “Капитализмыг алгасч” зурагт хуудас, “Фронтын бэлэг”, “Жаахан шаргын нутгаар”, “Эмч ирлээ” зэрэг алдарт бүтээлүүдийг туурвисан юм. Мөн тэрээр Монгол хүний сэтгэлд хоногшин үлдсэн “Ээжээ сайн байна уу?” өнгөт хулдаасан зургаа өөрийн балчир охидоос санаа авч зурж байжээ. Д.Амгалангийн хоёр хүүхэд болох Жаргалан, Жавхлан нар тэрхүү зургийн хараад “Энэ би” хэмээн хоорондоо булаацалдахад тэрээр “Та нар бүгдээрээ өөрийгөө гэж бод, өглөө босоод л ээж рүүгээ тэмүүлцгээдэг шүү дээ” гэж хэлсэн тухай шавь нар нь дурсан ярьсан байдаг.