Улаанбаатарт газар хөдлөлтөнд тэсвэргүй барилга олон байна
1970 оноос хойш баригдсан барилга газар хөдлөлтийг тооцож барьсан ч холбогдох норм, дүрэм хангахгүй байна. Тодруулбал, 78 сургууль, 103 цэцэрлэг, оюутны 25 байр байгааг Мэргэжлийн хяналтын ерөнхий газраас тогтоожээ.
Улаанбаатар хот дахь төрийн өмчит 13 хичээлийн байр, 12 дотуур байр газар хөдлөлтөд тэсвэргүй гэнэ. Хяналт шалгалтад хамрагдсан бүх сургуулийн барилгад ээлжит засвар, тордолгоог цаг хугацаанд нь хийгээгүйгээс барилгын чанар муудаж байна.
Үүнд:
- Боловсролын их сургуулийн “Г” байр,
- ШУТИС-ийн 2 дугаар дотуур байрны ашиглалтыг нэн даруй зогсоож,
- Соёл урлагийн их сургуулийн хичээлийн төв байрны барилгын үндсэн хийц, бүтээцийг яаралтай бэхэлж, хүчитгэх шаардлагатай болжээ.
Мэргэжлийн хяналтын байгууллагаас хийсэн хяналт, шалгалт, улсын байцаагчийн тавьсан акт, гаргасан дүгнэлт, албан шаардлагын мөрөөр нийслэл хот тодорхой ажлуудыг хийж гүйцэтгэж байна. Тухайлбал СБД-ийн нутагт байрлах 3 дугаар сургууль, БГД-ийн 22 дугаар сургуулийн А блок, 70 дугаар сургуулийн барилгыг буулгаж шинээр барилаа.
СБД-ийн 11 дүгээр сургууль, ЧД-ийн 5 дугаар сургууль, БЗД-ийн 92 дугаар сургууль, 146 дугаар цэцэрлэг, ХУД-ийн 32 дугаар сургууль, БГД-ийн 38 дугаар сургуулийн “Б” блок, 57, 47 дугаар цэцэрлэг, СХД-ийн 26 дугаар цэцэрлэгийн барилгын ашиглалтыг зогсоож, байрыг нь суллан, эхнээс нь шинээр барьж эхэлжээ.
Нийслэлийн Иргэдийн Төлөөлөгчдийн Хурлын Тэргүүлэгчид 2015.10.19-ний өдөр хуралдан БЗД-ийн 3 дугаар хороонд байх Сувиллын цэцэрлэг, яслийн 10 дугаар цогцолбор, 14 дүгээр дунд сургууль, ХУД-ийн 11 дүгээр хороонд байрлах 32 дугаар сургууль, БГД-ийн 4 дүгээр хорооны нутагт байх 38 дугаар сургуулийн “А” байр, ЧД-ийн 18 дугаар цэцэрлэгийн байрыг акталж концессийн гэрээгээр шинээр өргөтгөхөөр шийдвэрлээд байна.