Исланд улсын харъяа, Дакараас 2 км-ийн зайд “Горий” арал дээр энэхүү боолын худалдааны төв байрладаг. Энэ нь Баруун Африкийн хамгийн эртний суурин газруудын нэг бөгөөд тэр үед боолын худалдааны төв байжээ. Арал 45 акр газартай, худалдаачид хүмүүсийг олзлон, эргэн тойрон усаар хүрээлэгдсэн зугтах боломжгүй энэ газарт худалдаалдаг байв. Эрдэмтдийн хийсэн судалгаагаар энд олон сая хүнийг боолчлон, Америкт ажиллуулдаг байсан гэсэн дүгнэлт гарчээ. Өнөөдөр Горий 1300 оршин суугчтай ба арал дээр ямар ч машин, орчин үеийн барилга байхгүй, гэмт хэрэг ч гардаггүй амгалан тайван газар учраас очиж үзэх хүсэлтэй жуулчдын тоо өссөөр байна.

     Горий арлын анхны оршин суугчид 1444 онд ирж сууршсан Португалийн далайчид байсан бөгөөд дараагийн хоёр зууны турш Голланд, Их Британи, Франц улсын эрхшээлд байсаар ирсэн. 1588 онд арлыг Голланд улс эзэлсэн байдаг. 1817-1960 оныг хүртэл Франц арлыг хяналтандаа авсан юм.

     1536-1848 оны хооронд боолын худалдаа идэвхтэй явагдсан байна. 1776 онд Голландчууд “Боолын танхим"-ыг барьжээ. Энд боолыг үнэ хаялцуулан худалддаг байсан бол 1962 онд жуулчдад зориулан музей болгосон юм.

     Тус байшингийн нэгдүгээр давхарт 2.6 метр тайлбайтай өрөөнд 15-20 эрэгтэй боол байрлаж байв. Эмэгтэйчүүд, хүүхдийг тусдаа хэсэгт байрлуулдаг. Залуу охидыг ихэвчлэн худалдах, худалдаачдын таашаалд зориулан тус тусад нь хадгалдаг байжээ. Боолууд зарагдталаа гурван сарын турш хүзүү, гараа гавлуулан, нуруу нуруугаараа харан сууж хүлээх хэрэгтэй болдог аж. Тэднийг өдөрт нэг удаа хооллодог байжээ. Африкаас жилд 26,000 хүн Америкт боолчлогдсон хэмээн түүхэнд тэмдэглэгдсэн байдаг.

     Горий арлыг жил бүр ойролцоогоор 200,000 жуулчин ирж үздэг бөгөөд 1978 онд ЮНЕСКО-гийн Дэлхийн өвд бүртгэгдсэн байна. II-р дугаар пап лам Жон Паул, Жорж Буш, Барак Обама, Нелсон Мандела болон дэлхийн хэд хэдэн улсын удирдагчид ирж үзжээ.