Монголын барилгын компаниудын нэгдмэл санаачилгаар байгуулагдаад удаагүй байгаа “Монголын бүтээн байгуулалтын түншлэл” буюу “Mongolian development partnership” (MDP) компани нь Сингапур улсад барилгын төсөл хэрэгжүүлэх сонгон шалгаруултад ялсан байна. Төслийн хүрээнд хоёр тал гэрээ байгуулахаар бэлтгэл ажилдаа оржээ. Энэ нь манай улсаас барилгын компани анх удаа гадаадын зах зээлд хөл тавьж байгаа тохиолдол юм байна. “MDP” компанийг “Цаст”, “Заг”, “Орчлон”, “Гандирс”, “Грийн ресурс констракшн” компаниудын түншлэлийн хүрээнд байгуулсан.

     Тус компанийн ТУЗ өчигдөр хуралдаж, гүйцэтгэх захирлаар В.Лувсанчүлтэмийг сонгон томилжээ. В.Лувсанчүлтэм нь МУИС-нягтлан бодогч, эдийн засагч мэргэжлээр төгсөж, Өмнөд Австралийн их сургуульд худалдааны магистр цол хамгаалсан, “Заг” группийн санхүү, хөрөнгө оруулалт эрхэлсэн захирал, Сингапур улсын “Алкем глобал прайвет лимитед” компанид Монголыг хариуцсан гүйцэтгэх захирал, Английн “Ферро Монголиа ресурс” компанийн ТУЗ-ийн гишүүнээр ажилладаг нэгэн аж.