Барилга хот байгуулалтын яам болон Сангийн яамны ажлын хэсэг өчигдөр хуралдаж, иргэдийн дунд ихээхэн хүлээлт үүсгээд буй ипотекийн зээлийн 30 хувийн урьдчилгааг 10 болгон бууруулах шийдвэрийн хэрэгжилтийн талаар хэлэлцлээ. Ингэхдээ хоёр талаас хэд хэдэн хувилбар гарган, асуудлыг олон талаас нь ярилцаж, саналыг нэгтгэсэн байна.

     Дээрх хувилбар саналуудыг өрхийн мэдээллийн нэгдсэн сан, орон сууцны үнэ ханш болон бусад олон талын судалгаа, мэдээлэлд тулгуурлан гаргасан аж. Орон сууцны сүүлийн үеийн үнийн судалгаанаас харахад нийслэл хотод орон сууцны нэг ам метрийн үнэ дунджаар 1,500,000-2,500,000 төгрөг, Төрийн орон сууцны корпорациас хэрэгжүүлж буй “Буянт-Ухаа 2” хороололд 1,350,000 төгрөг, орон нутагт 850,000-1,250,000 төгрөг байгаа.

     Ер нь санхүүгийн эх үүсвэрийг баталгаажуулснаар 10 хувийн урьдчилгааг хэрэгжүүлж эхлэхэд хүлээгдэх асуудал байхгүй, зээлийн хэрэгжилтийг аль болох хурдан эхлүүлж, олон иргэнийг хамруулахыг хичээж байгаа хэмээн Барилга хот байгуулалтын сайд З.Баянсэлэнгэ мэдэгдсэн юм. 2015 онд засгийн газраас баталсан 256-р тогтоолоор ипотекийн зээлийн урьдчилгаа 30 хувийг 10 болгон бууруулах шийдвэрийг гаргахдаа 200 тэрбум төгрөгийн хөрөнгийн эх үүсвэрийг баталсан. Уг санхүүжилтийг шууд гаргах хөрөнгө, боломж байхгүйгээс ажлыг шат дараалан хэрэгжүүлэхээр төлөвлөж байгаа аж.