2000 оноос барьж, ашиглалтанд оруулж эхэлсэн “Богд Ар” хорооллын оршин суугчид тэдэнд амласан сургууль, цэцэрлэг, автомашины зогсоол байгуулж өгөхийг шаардан мэдэгдэл хийлээ.  Анх 1088 айлын орон сууц, 640 орчим хүүхдийн сургууль, 240 хүүхдийн цэцэрлэг болон иргэдэд нийгмийн халамжийн үйлчилгээ хүргэх зарим төвүүдийг байгуулж өгнө гэсэн амлалттайгаар захиалгчдад орон сууцаа борлуулж байсан “Богда Холдинг” компанийн удирдлагууд одоог хүртэл түүнийгээ биелүүлээгүй байгаа аж.

     Өнгөрсөн 15 жилийн хугацаанд эдгээр бүтээн байгуулалтуудын аль нь хийгдээгүй бөгөөд барилгыг чанар стандартын дагуу гүйцэтгээгүйн улмаас байрны хана нурах, дээврийн төмөр ховхорч унах, ус алдаж агааржуулалтын системгүйгээс болж өмхий үнэр үнэртэх, сантехникийн асуудал өдөр тутам тулгарах гээд олон асуудал энэ хорооллын оршин суугчдыг тойрсонгүй. Гэтэл цэцэрлэг сургууль барьж өгнө гэсэн газар дээрээ 12 давхар орон сууц барих гэж байгаа талаар оршин суугчид нь мэдэгдэж, гомдол гаргаж байна.

     Энэ талаар “Тэнгэрийн гэгээ” СӨХ-ны удирдах зөвлөлийн гишүүн Г.Нямдаржаа ярихдаа, “Оршин суугчдын тав тухтай амьдрах орчныг бүрдүүлж, сургууль, цэцэрлэгийн барилга барьж өгөхийг бид шаардаж байна. Сүүлийн дөрвөн жилийн турш бид гомдол гаргасан. Харин Нийслэлийн ерөнхий төлөвлөгөөний газраас энэ газарт барилга барих зөвшөөрөл олгосон байна. Энэ зөвшөөрлийг цуцалж, анхны баталсан зургийн дагуу сургууль, цэцэрлэг, автомашины зогсоол байгуулахыг оршин суугчид шаардаж байна” гэсэн юм.

     Түүнчлэн тус хороололд байрладаг зоогийн газрууд хог хаягдлаа орон сууцны хоолой руу асгадаг нь хонгил, автомашины зогсоолын хэсэг рүү урсаж, иргэдэд ихээхэн хүндрэл учруулдаг талаар тэд мэдэгдлээ. Энэ талаар холбогдох мэргэжлийн байгууллагууд, НМХГ-т тухай бүрт нь мэдэгддэг ч зөрчил нь тогтоогдоогүй гэсэн үндэслэлээр хариуцлагаас мултраад үлддэг аж. Мөн тодорхойгүй үйлчилгээ үзүүлсэн нэрийдлээр нэмэлт төлбөр хураамж авах зэргээр оршин суугчдыг хохироож байгааг хурал зохион байгуулагчид хэлсэн юм.