“Herzog & de Meuron” компани алдарт Чельси хөлбөмбөгийн клубт зориулан байгуулах гэж буй шинэ цэнгэлдэх хүрээлэнгийн төлөвлөлтийг танилцууллаа. 500 сая долларын өртөгтэй тус цэнгэлдэх хүрээлэнг Стэмфорд гүүрний орчимд барихаар төлөвлөжээ. Байгууламжийн зураг, загвар зэрэг нь албан ёсоор гараагүй байгаа ч, клубийнхэн олон нийтийн уулзалт зохион байгуулж, төлөвлөлтийн талаар танилцуулсан юм.

     Өнгөрөгч нэгдүгээр сард “Herzog & de Meuron” нь талбайн мастер төлөвлөгөө гаргагч “Lifschutz Davidson Sandilands” компанийн ажлыг гүйцэтгэхээр сонгогдсон аж. Тус хүрээлэнд нийт 60 мянган суудал төлөвлөжээ. Долдугаар сарын эхээр болсон хэлэлцүүлэг дээр хэсэгчилсэн рендер зургуудыг гаргасан бөгөөд 1250 харилцагчийн 92 хувиас нь зөвшөөрсөн хариу авсан байна. Өвөрмөц загвар дизайн бүхий уг цэнгэлдэхэд нарийн тоосго ашиглан готик маягийн архитектурын шийдлийг шингээжээ.