Энэхүү байшин нь эргэн тойрон 12 метр газарт модоор хүрээлэгдсэн бүхэлдээ шилэн хана бүхий байшин юм. “Байшин доторх мод” гэх өвөрмөц нэртэй уг байшин Казакстаны Алматы хотын уулархаг бүс дэх ой модон дунд байрлах бөгөөд энэ нь орчин үеийн завгүй амьдрал, их хотын ачааллаас бүрэн тусгаарласан өвөрмөц загвараар зохион бүтээгдсэнээрээ онцлогтой. Нэвт харагдсан архитектурын шийдлийн цаад санаа нь байгаль орчинд илүү ойр байж, амар амгаланг мэдрэх гэсэн хүний хүслэнтэй шууд холбоотой аж.

     4 давхар бүхий уг байшингийн давхар тус бүр нь хоорондоо эргүүлгэн шатаар холбогдсон дөрвөн метал тулгуураас бүтэх бөгөөд үүнийг давхар шилэн ханаар бүрсэн байна. Өнгөрсөн онд 38 настай нэгэн бизнесмэн эрийн захиалан бариулсан 240000 фунт стерлингийн үнэтэй энэхүү цилиндр байшингийн голд аварга том гацуур мод сүндэрлэх аж.




     Байшинг 5 сарын хугацаанд барьж гүйцэтгэсэн архитектор Айбек Алмасов: “Уг төсөл нь нүргээнтэй их хотын амьдрал, амьсгал давчдам том барилгуудаас залхаж, хэв маягаа өөрчлөн, байгал дэлхийтэйгээ ойр амьдрахыг хүссэн нэгэнд зориулагдсан бүтээл юм. Түүний үзэгдэх орчныг тусгаарлахгүйгээр, тав тухтай орчныг бий болгохыг зорьлоо” хэмээн ярьсан юм.

     “Үйлчлүүлэгч маань найз нөхөдтэйгөө тааваараа амарч, чөлөөтэй эргэцүүлэн бодох амар тайван орчныг бүрдүүлсэн хоёр хүний байшин бариулахыг хүссэн. Энэ бол бидний хувьд маш гайхалтай бүтээл. Үүгээрээ ч бахархаж байна” хэмээн тэрээр үргэлжлүүлэн хэллээ.



     Өдгөө 22 настай архитектор залуу, дөрвөн хамтрагчийнхаа хамт үүнтэй төстэй байшин бариулахыг хүссэн хэд хэдэн захиалга хүлээн авсан гэнэ. Байршлын хувьд өндөр үнэ хүрдэг энэ хэсэгт амины орон сууцны дундаж үнэ 620000 фунт стерлинг байдаг аж. Харин залуусын санаачилсан энэхүү өвөрмөц байшингийн өртөг харьцангуй бага аж.