Концессийн гэрээгээр дахин баригдах сургууль, цэцэрлэгийн тоонд багтсан Хо-Ши-Миний нэрэмжит 14-р сургуулийн багш, сурагчид, эцэг эхийн зөвлөлийнхөн барилгын ажлыг яаравчлан гүйцэтгэх шаардлага тавьж буйгаа мэдэгдэн, хэвлэлийн бага хурал хийлээ. 1957 онд ашиглалтанд орсон сургуулийн “А” байр нь хуучирч, муудан үйл ажиллагаа явуулах боломжгүй болсон учраас засгийн газраас тус барилгыг концессийн гэрээгээр барих төслийн тоонд багтаасан. Гэсэн ч үйл ажиллагааг нь зогсоосноос хойш 3 дахь намартайгаа золгож буй тус сургуулийг ашиглалтад оруулах нь байтугай эзэнгүй балгас мэт мартаж орхисон нь ийнхүү тус сургуулийнхны бухимдлыг хүргээд буй аж.

     Сургуулийн барилгыг барих концессийн гэрээг “Залуучуудын нээлттэй боловсролын корпораци” компанитай байгуулж байжээ. Харин гэрээ байгуулах ажлыг удирдан зохион байгуулахыг Аж Үйлдвэрийн сайдад даалгасан. Гэрээ ёсоор барилгыг 14 сарын дотор буулгаж, бүрэн барьж дуусган ашиглалтад хүлээлгэн өгөх ёстой. Гэтэл өнөөдрийг хүртэл асуудал шийдэгдэх бус, харин Хятадын өөр нэгэн компанид барилгын гүйцэтгэлийн ажлыг шилжүүлэхээр болсон гэх боловч өнөөг хүртэл асуудал хаана гацсан нь тодорхойгүй байгаа аж. Тиймээс сургуулийн сурагчид, багш нар, эцэг эхийн зөвлөлийн төлөөлөл Засгийн газрын хэрэг эрхлэх газар, Боловсрол соёл, шинжлэх ухааны яам, Аж үйлдвэрийн яаманд тус тус шаардлага хүргүүлэхээр болжээ.



     Өнгөрсөн 2 жилийн хугацаанд 14-р сургуулийн 2700 гаруй сурагчийг сургуулийн “Б” байранд 1-3-р ангийн хүүхдүүдийг 3 ээлжээр, “Шавь” цогцолбор сургуульд 4-5-р ангийг 3 ээлжээр, 92-р сургуулийн өргөтгөлд 7-р ангийг 2 ээлжээр, 92-р сургуульд 6, 8, 12-р ангийг 2 ээлжээр, 44-р сургуульд 12-р ангийн сонгох хичээлийг явуулах гэх мэтээр 5 хэсэг хуваагдан хичээллүүлж байгаа юм. Ингэснээр 3-р ээлжийн ангиуд орой 19 цаг 45 минутанд тарж байгаа нь ялангуяа бага ангийн хүүхдүүдэд хүндхэн тусч байгааг сургуулийн багш нар онцоллоо. Өөрийн гэсэн байр, анги танхимгүй учраас лаборатори, техник технологи бүхий тусгай орчинд явагдах ёстой хичээлүүд орхигдож, хүүхдүүдийн сурч боловсрох нөхцлийг хангаж чадахгүйд хүрч, багш нарыг олон сургууль дамжин хичээлээ заахад хүргэжээ. Мөн сургуулийн өөрийн тоног төхөөрөмж материаллаг бааз тэр чигээрээ агуулахад хадгалагдаж, тэдгээрийг ашиглах ч боломжгүй байгаа аж. Энэ бүхнээс харахад, хүүхдийн эрүүл, аюулгүй орчинд сурч болвсрох эрх бүрэн зөрчигдөж байгаа учраас асуудлыг яаралтай шийдвэрлэж, сургуулийн барилгын ажлыг хэвийн явуулж, яаралтай дуусгавар болгох шаардлагыг тэд хүргүүлж байгаа гэдгээ тайлбарлалаа.

     “Залуучуудын нээлттэй боловсролын корпораци”-иас барилгын ажлыг гүйцэтгэх эрхийг нь шилжүүлэн авсан гэх Хятад компанийн талаарх мэдээлэл ч дулимагхан, асуудал хаанаа гацсан нь ч тодорхойгүй байгаа учраас сурагч, багш нарын төлөөлөл шаардлагыг хариуцаж буй Төрийн 3 байгууллагад хүргүүлж байгаа аж.