Иргэдийн чөлөөт цагаа өнгөрүүлэх тав тухтай, эрүүл орчныг бүрдүүлж, нийслэл хотод ногоон байгууламж, өнгө үзэмж нэмэх зорилгоор Чингэлтэй дүүргийн 5-р хорооны нутаг дэвсгэрт байрлах Тасганы овоо орчмын 1.7 га газрыг бичил цэцэрлэгт хүрээлэнг байгуулж, албан ёсоор ирэх Баасан гаригт ашиглалтанд оруулахаар боллоо. “Улаанбаатар-Цэвэр агаар” төслийн хүрээнд энэхүү бичил хүрээлэнг загвар төсөл болгон хэрэгжүүлж байгаа аж. Тасганы овоо орчимд өмнө нь байсан хэд хэдэн жижиг овоог нэгтгэж, усалгааны систем, замын гэрэлтүүлэгтэй холбож, нийт 5 төрлийн 4129 ширхэг мод, сөөгийг тарьж ургуулан, 1073 ам метр явган зам, хаалга бүхий ногоон орчныг бүрдүүлсэн байна.

     Энэхүү загвар төслийг хэрэгжүүлснээр нийслэл хотын нөхцөлд хамгийн сайн тохирохуйц ногоон байгууламжийн төрлийг тодорхойлох, тогтмол услагаатай, услагаагүй болон бордоотой, бордоогүй гэх мэт өөр хоорондоо ялгаатай ногоон байгууламжийг хэрхэн нэмэгдүүлж болох талаарх судалгаа, туршилтыг мэргэжилтнүүд хийж гүйцэтгэжээ. Цэцэрлэгт хүрээлэнг Баасан гариг буюу 9-р сарын 4-ний өдөр нээж, ашиглалтанд оруулна.