Өнөөдөр “Хотын хүрээлэн буй орчныг сайжруулах нь” сэдэвт семинарыг Нийслэлийн Засаг Даргын Тамгын Газар болон Япон улсын Цукуба Их Сургуулиас хамтран зохион байгууллаа. Тус семинарын хүрээнд “Хүнд металыг байгалийн хүчин чадлаар устгах, Эко стандарт, нийтийн халуун усны газар, Улаанбаатар хотын хүрээлэн буй орчны тулгамдаж байгаа асуудлууд, мөн хэрэгжүүлж байгаа зарим арга хэмжээ, үр дүн”-гийн талаар хэлэлцсэн юм. НЗДТГ тус сургуультай 2014 онд албан ёсоор хамтран ажиллах санамж бичигт гарын үсэг зурсан бөгөөд энэ чиглэлээр семинар зохион байгуулж байжээ.
НЗД-ын Экологи, ногоон хөгжлийн асуудал хариуцсан орлогч Т.Бат-Эрдэнэ хэлэхдээ,

Энэ Цукуба Их Сургуультай хамтран жил хоёр дахь удаагаа уулзалт, семинарыг зохион байгуулж байна. Тус сургууль хүрээлэн буй орчны талаар судалгаа хийж, түүнийг хамгаалах чиглэлээр бодлого боловсруулдаг. Хамтын ажиллагааны хүрээнд тус сургууль нь өнгөрсөн жил хүрээлэн буй орчны сургалтаар 8 мэргэжилтнийг сургасан. Цаашдаа жил бүр богино болон урт хугацааны сургалтанд НЗДТГ-ын мэргэжилтнүүдийг хамруулах зөвшилцөлд хүрсэн. Түүнчлэн тус сургуулийн төлөөлөл жилд нэгээс доошгүй удаа манай улсад хүрэлцэн ирж сургалт, уулзалт, семинар зохион байгуулж байх юм. Мөн Улаанбаатар хотыг хөгжүүлэх чиглэлээр Зүүн, Хойд Азийн хотуудын чуулга уулзалтыг энэ сарын 21, 22-нд нийслэл хотноо “Ногоон хөгжил” сэдвээр зохион байгуулах гэж байна.