Өнөөдөр Төрийн ордонд болсон “Хотын усны цогц менежмент” хуралдаанд УИХ-ын гишүүн, засгийн газрын гишүүн бөгөөд Барилга, хот байгуулалтын сайд З.Баянсэлэнгэ оролцлоо. Хурлыг нээж хэлсэн үгэндээ тэрээр, НҮБ-ын Мянганы дээд хэмжээний чуулга уулзалтаар баталсан “Мянганы тунхаглал” баримт бичиг 2015 он хүртэлх хугацаанд шийдвэрлэвэл зохих ядуурал, эрүүл мэнд, боловсрол, ундны ус, хүрээлэн буй орчинтой холбоотой тулгамдаж буй асуудлыг багцлан Мянганы хөгжлийн үндсэн 8 зорилтыг тодорхойлсон болохыг танилцуулсан. Тус зорилтын дагуу “2015 он гэхэд баталгаат ундны усны хангамжтай хүн амын эзлэх хувийг 60, сайжруулсан ариун цэврийн байгууламжид хамрагдсан хүн амын эзлэх хувийг 40 болгох” зорилт дэвшүүлсэн болохыг тэрээр дурдсан юм.

     Зорилтын хүрээнд олон төсөл, арга хэмжээ хэрэгжиж байгааг салбарын сайд онцлоод, манай орны нийт хүн амын 80.4 хувь нь баталгаат ундны усны хангамжтай, 41.1 хувь нь сайжруулсан ариун цэврийн байгууламжтай болсныг дурдлаа. Мөн салбарын хууль, эрх зүйн орчин, норм нормативыг сайжруулах зорилгоор “Хот суурины ус хангамж, ариутгах татуургын ашиглалтын тухай хууль”-д нэмэлт, өөрчлөлт оруулах, “Нийтийн аж ахуйн үйлчилгээний салбарын стратеги” бодлогын баримт бичгийг боловсруулах ажлыг эхлүүлээд байгааг тэмдэглэлээ. Цаашид хот суурин газрын хөрс, агаарын бохирдлыг бууруулах, иргэдийн орон сууцны хангамж, нөхцлийг сайжруулах зорилгоор хийх ажил олон байгааг дурдаад, хуралдаанд оролцогчдод амжилт хүссэн юм.

     Дэлхийн Усны Түншлэлийн хөтөлбөрийн боловсруулсан “Хот усны цогц менежмент”-ийн шинэ загварчлалыг Улаанбаатар хотын жишээн дээр турших, улмаар Туул голын сав газарт байгаа нийслэл хотын усны тогтвортой менежментийг бий болгох, нийслэлчүүд, ард иргэдээ найдвартай, тасралтгүй цэвэр усаар хангах боломжийг бүрдүүлэх ач холбогдолтой юм байна.

     Монгол Улсын хот суурин газрын ус ашиглалт болон усны нөөцийн менежментийг боловсронгуй болгох зорилгоор Дэлхийн усны түншлэл, Дэлхийн банк, Усны түншлэлийн хөтөлбөрийн дэмжлэгтэйгээр Монголын Усны түншлэл ТББ тус арга хэмжээг зохион байгуулжээ.