Дэлхийн үл хөдлөх хөрөнгийн зах зээлд тэргүүлэх байр суурь эзэлдэг Гонгконгт сүүлийн 20 гаруй жилийн хугацаанд орон сууцны үнэ олон нийтийн дунд арилжаалагддаг хувьцаатай салшгүй холбоотой байсаар ирсэн. Тэгвэл “Bocom International Holdings” компанийн шинжээч Алфред Лау энэ зах зээлд 20 хүртэлх хувийн уналт гарч болзошгүй хэмээн таамаглал дэвшүүлээд байна.

     “Centaline Property Agency” компанийн эмхэтгэсэн Гонгконгийн орон сууцны үнийн үзүүлэлтэд, “Hang Seng Properties Index” энэ улиралд 15 хувиар буюу огцом буурснаар рекорд тогтоожээ. Энэ нь хамгийн сүүлд үл хөдлөх хөрөнгийн зах зээлд огцом уналт болсон 1998 оноос хойших хамгийн их бууралт үзүүлсэн дүн болжээ.

     “Bocom” компанийн шинжээч Лау хэлэхдээ, “Бид үл хөдлөх хөрөнгө бодит үнэд хүрэх зөв эргэлтийн үе дээр ирээд байна. Үнийн бууралт 10-20 хувьд хүрнэ гэж бид таамаглаж байна. Харин хувьцааны үнэ хэдийнэ 10-15 хувийн уналтанд хүрсэн байгаа” гэсэн юм.

     Орон сууцны үнэ 8-р сард өсөлттэй байсан ч, борлуулалт буурах төлөв ажиглагджээ. Хятадын эдийн засгийн төлөв байдал болон Холбооны нөөцийн сангаас хүүгийн ханшийг нэмэгдүүлэхээр төлөвлөж буй энэ үед хувьцааны гүйлгээний тоо 37 хувиар буурсан байна. Энэ нь орон сууцны үнэ буурахад нөлөөлнө гэж шинжээчид үзэж байгаа. Тухайлбал, “JP Morgan Chase & Co” компанийн шинжээч Куссон Линг, “Morgan Stanley” пүүсийн Правин К.Чоудхари нар Гонгконгийн үл хөдлөх хөрөнгийн үнэ ирэх онд 10 хувиар буурна хэмээн таамаглажээ.